…Famianan di Sonya Massey ku un retrato dje víktima. Nan lo risibí 10 mion dollar komo indemnisashon pa morto di nan ser kerí na man di un polis…
WASHINGTON (AFP).- E famia di un señora koló skur asesiná pa tiru di un agente polisial den su kas na Illinios, a yega na un akuerdo di 10 mion dòler ku departamento di shèrif lokal i e hunta di e siudat kaminda e insidente a tuma lugá.
Sonya Massey, di 36 aña i mama di dos yu hòmber, a keda matá pa un agente den yüli di 2024 den un kaso ku a hala atenshon nashonal.
E direktiva dje siudat di Sangamon a aprobá un akuerdo pa indemnisá ku 10 mion dòlerr e herederonan di Massey.
E abogado di derechinan sivil, Ben Crump, kende a representá e famia di otro viktimanan pretu afektá pa violensia polisial, a selebrá e akuerdo, kalifikando komo “un promé paso pa logra hustisia total” pa Massey.
E insidente a tuma lugá despues ku e viktima, ku den pasado a risibí tratamentu pa problema di salú mental, a yama e linia di emergensia 911 pa informá ku tin un posibel intruso den su kas.
Dos agente a yega e sitio despues di mei anochi. Imágennan di kámara na unifòrm dje polisnan a mustra Massey papiando ku polisnan i buskando den su tas despues ku nan puntr’é pa identifikashon.
E agente Sean Grayson na e momento ei a pidi’e pa kita for di riba stof un wea ku awa ku tabata herebé. Ora ku e agente a regresá den e sala, Massey a puntr’e di kon i e polis hariendo a kontestá: “Leu for di bo awa kayente”.
Massey, ku tabatin e wea den man, ku kalmu a respond’é: “Oh, mi ta reklamá bo den nòmber di Hesus”, riba kua e agente a saka su arma i a bisa “mihó bo no hasi e kos ei, maldita sea. Mi ta hura den nòmber di Dios ku lo mi tira bo den bo kara”.
Despues di a pidi despensa, Massey a hinka rudia, pa despues e polis tira tres biaha, matando e muhé ku un bala ku a alkans’é den kara.
Tabata e promé insidente grandi ku hende di kolo skur komo víktima, despues dje kaso di George Floyd den 2020. Floyd, tambe kolo skur, a muri víktima di un polis blanku na Minneapolis.
