…Bandera aleman (r) i bandera ukraniano; dos pais ku bon relashon polítiko ku otro…
BERLIN, Alemania (AFP).- Alemania ayera a aprobá un yudansa militar nobo pa Ukrania pa un montante di 3.000 mion euro (3.248 mion dòler), promé ku e buèlta di negosashon entre Merka, Rusia i Ukrankia pa logra un tregua parsial.
E komishon di presupuesto di parlamento aleman a duna lus bèrdè pa e yudansa, ku tabata den suspenso ya pa algun luna debí na e dudanan dje kansiyer saliente Olaf Scholz, preokupá pa e situashon di presupuesto dje pais.
E fondonan lo keda destiná pa suministrá ekiponan di defensa na Ukrania den su guera ku e forsanan ruso, inkluso munishon i sistemanan di defensa anti aereo.
E 3.000 mion euro akí ta suma na e 4.000 mion di euro di yudansa militar na Ukrania manera ta pará den e presupuesto di 2025.
E komishon parlamentario aleman a asigná pa Kiev 8.300 mion euro mas pa e periodo entre 2026 i 2029, aunke ta posibel ku e kantidat ei lo keda kompletá ku mas gastu prosedente di un pakete fiskal nobo.
E bosero di gobièrnu, Stefen Hebestreit, a duna di konosé ku e último pakete ta inkluí unidatnan di e sistemanan di defensa anti aereo Iris-T, di fabrikashon aleman, ku ainda no a keda fabriká i ku lo keda entregá den próksimo dos añanan.
