Flavina Wanga; Fundashon Konsiente
Di Konsiente pa fundashon Konsiente
Konsiente tabatei promé i despues a bira fundashon Konsiente un inisiativa di Flavina Wanga. Relatando pa Djasabra e orígen di Konsiente, el a splika ku ta trata di un proyekto ku el a kuminsá 8 aña pasá promé ku Covid. E mes komo usuario di plataformanan sosial manera Facebook i Instagram, el a tuma nota ku esakinan tabata birando negativo. Flavina a tuma nota ku tabatin hopi papiamentu di palabra malu, insultá otro, kompartí kosnan agresivo i sigur ménos positivo. “Si nos komo adulto ta hasi asina, ta ki ehèmpel nos ta duna nos muchanan ku tambe ta usa e plataforma ei. Banda di esei mi tabata tende di mayornan ku nan no sa kon pa usa e plataformanan i ta e muchanan ta siña nan”. Den e kuadro ei Flavina a kuminsá ku Konsiente, ku su meta pa duna hende grandi e tempu ei e konosementu di e plataformanan di media sosial pa nan sa i pa nan por siña nan muchanan kon pa us’e na un forma seif i no bira víktimanan di cyberbylling, problemanan mental, sexting, pedofilnan i tur e riesgonan ku e por trese.
E mucha tin hamber pa sa mas
Asina Flavina a kuminsá promé ku Covid, dunando lès entre otro na dosentenan pa asina nan por pas’e over na nan studiantenan i asina mas i mas skolnan tabata pidi pa anochi di informashon pa entre otro mayornan tambe. I miéntras aña tabata pasa Flavina ta haña dosentenan tabata pidié pa duna e muchanan tambe. Asina el a kuminsá duna lès na e muchanan tambe. El a nota aki e hamber serka e muchanan pa sa mas. Ta yuda nan pensa krítiko, voral awor ku AI, cyber bulling, pedofil, gaming pasobra kasi tur mucha awor aki ta hunga e weganan aki. El a kuminsá ei muchanan for di 4 aña te esnan mas grandi.For di skol di fundeshi, skol sekundario i skol spesial. E ta atendé tur tur tema ku por atendé ku e muchanan. I tur esaki a kondusí ku aña pasá Flavina a lanta Fundashon Konsiente, ku un meta similar pero tòg poniendo énfasis riba algu otro. Nan ke trese e konsientisashon pa pueblo kompleto via di media, kampañanan ku gobièrnu pa bin ku kosnan ku ta netamente konsientisá e hende abase di e meta di fundashon Konsiente.
Balansa digital
I tin algun aña kaba ku Konsiente ta partisipá den kampaña huntu ku Week van de Media Wijsheid ku ta na novèmber. E Netwerk ei ta eksistí pa 20 aña kaba i siendo Flavina un Media Coach sertifiká, e ta forma parti di e siman pa kampañanan di konsientisashon. E Media Coach segun el a konta nos ta guia mayor i muchanan riba e temanan i meta di Konsiente. Na Ulanda tin masha hopi Media Coach i un bia pa aña nan tur ta bin huntu pa tira un bista i atendé tur loke ta bin dilanti. I den e kuadro ei nan ta partner ku Media Wijsheid ku ta enfoká tur aña riba un tema spesífiko. Esaki ta e di tres aña di e siman di konsientisashon na novèmber ku ta Digitale Balans. Tur kos segun Flavina ta e balansa ku ta pone den e uso di e media sosial.
Di media sosial marketing pa konsientisá
Flavina mes a studia Bedrijfs Economie na Ulanda i despues a bai traha komo akountent i na Kòrsou el a traha 10 aña den diferente kompania. Despues e tabata na un Offshore Company pero a pèrdè trabou despues ku el a kaba di haña yu, ounke esei no tabata un shòk p’e pasobra trahando den e departamento di finansa el a mira ku e kosnan no ta bayendo bon. Flavina a keda kas un aña ku su yu. Pa e lora man un poko el a kuminsá bende paña di beibi pasobra e tabata haña e preisnan na Kòrsou tòg un poko karu. E tabata bende online so. E tabatin un kompania ku ta hasi socialmedia marketing i asina el a mira kon e situashon tabata kambiando i el a kuminsá asina ku Konsiente.
Konsientisá for di chiki
Den tur e temanan ku e ta atendé kuné, Flavina ta haña ku e tema ku ta rekerí mas atenshon ta mas bien tur. E no por skohe pa un spesífiko pasobra ora un hende ta skrol riba e plataformanan, e por tòp tur sorto di tema. Por tin tema di agresividat, fake news, AI esta kosnan ku no ta real, friend request, scram i hopi mas. Loke e ke mira ta pa e temanan aki drenta den lèsnan di skol. Skolnan ta digitalisando i su deseo ta pa kuminsá ku e lèsnan aki for di skol di fundeshi. Ta for di beibi ta duna un mucha tablet pero e tin su riesgonan. No mester lubidá ku status ta kambia un tras di otro i si kada un ta dura djis algun sekònde, den mei ora e yu a wak mas di 30 ‘story’. I p’esei mester protehé siñ’e kon e ta protehá su mes tambe pasobra nos no por ta 24/7 ku nos yunan. P’esei e meta di Konsiente ku ta e Media Wijsheid esta duna e konosementu na tur hende pero tambe e empoderamentu di media pa tuma e desishonnan korekto ora algu presentá.
Krea konfiansa ku bo yu
Kon ta konsientisá i yuda e mayor pa e di su parti pa guia su yu siendo ku e no por ta 24/7 kuné. Flavina a konta nos ku tin e ‘parental control’. E app nan bo mester tin 13 aña pa por tin nan. Pero for di Skol di Fundeshi 7 i 8 aña el a nota ku e mucha tin e app nan aki. I p’esei komo mayor ku ta laga su yu usa e app nan aki, e mester tin un tipo di guia pa asina e mucha no sinti ku no ta un polis e tin riba dje pero un guia. Un mayor su ròl mas bien mester ta ku e ta envolví den tur loke su yu ta hasi, kisas ku diálogo, kombersá ku e yu di kiko el a hasi tur dia. Meskos ku ta puntra e yu ora busk’e na skol kon a bai na skol e dia ei, tambe puntr’e kon a bai riba su tablet i kiko tur el a hasi. Por pone e ‘parental control’ ora e ta chikí i restringí nan pa sierto kos pa nan no tin akseso kompleto na Internèt pero no mester pèrdè for di bista ku e mucha ei for di chikí ta kuminsá protesta. I komo mayor mester a krea e komunikashon i e relashon ku ta papia ku e yu ei tur dia pa asina a krea e konfiansa ku si algu pasa den e ratu ku no ta huntu ku nan, ku nan ta bin serka nan mayor i sea puntra òf bisa algu, maske nan sa ku e ta robes òf ku mama i tata lo rabia.
E mucha tin derechi pero tambe obligashon
Ántes un mayor ta habri e yu su tas i kontrolá òf ta habri su agènda i wak den dje, pero kon e ta awor aki. Flavina a bisa ku ta un remarke ku e ta haña tur ora ku ta dunando charla òf guia na mayornan. E ta bisa e mayornan tur ora ku Kòrsou a firma un akuerdo ku Nashonnan Uni ku ta e tratado di derechi di mucha ku ta kontené 43 artíkulo i den dje tin un definishon ku mucha (0-18) e mayornan no mag di bai den e mucha su telefòn. I tin diferente organisashon na Kòrsou ku ta siña e mucha di su derechinan. I p’esei ora Flavina bisa esei den lès, e mayornan ta bira bisa ku ta e a kumpra e telefòn. I den hopi di e seshonnan ei ta haña Buurt Regiseur di polis i nan reakshon semper ta ku e mucha tin derechi pero e tin obligashon tambe. Esaki ta nifiká ku e mucha tambe tin di kumpli i duna informashon. Tur kaminda tin regla, ounke ta un liña fini di kiko si i kiko no pero tin regla kon pa hasié. Flavina hopi bia ta tende ku ora e mayornan ta hopi strèn e mucha ta usa telefòn di un amiga òf tin un di dos telefòn. Nos muchanan ta super kreativo i sea bo sa òf no sa si bo ta muchu strèn nan ta hasi kosnan skondí. Ora no tin e konfiansa, e mucha ta bai hasi kos skondí te ora e kos perhudik’é pa restu di su bida.
Telefòn ta meskos ku un laman ganchu
E reto di mas grandi awor aki den uso i konsientisashon di e plataformanan sosial segun Flavina ta e mayornan mes. Hopi bia ora mayornan organisá e seshonnan aki e asistensia di mayornan ta masha pober mes. I ora puntra despues dikon e mayor no a bin, nan ta bisa literalmente ku nan sa tur kos kaba i ta kiko e por bai siña i e kos ei no ta pasa su yu. I esaki no di skolnan so, pero den tur tipo di organisashon kaminda tin hóbennan. E ta kere ku nunka un hende ta kaba di siña. E mes ku ta un media coach, den tur seshon e ta siña algu sea di e mayor, di e dosente i asta di e muchanan mes. Eksperensia ta mustra ku nunka un hende sa tur kos i si e sera su mes i bisa e kos ei no ta pasa nan yu nunka, anto bo ta priva bo mes di nota sierto señalnan ora algu no ta bai bon. I p’esei e ta purba empoderá e mayornan ku e konosé e yu mihó ku otro. Pero si e mayor no tin sufisiente konosementu, nan mes no sa kiko e app nan ta kiko e posibel peliger ta, kon e por guia e yu. No por benta e yu den laman ganchu i kere ku e por lanta. I telefòn tambe ta un laman ganchu.
Ora pa pantaya
Ku kuantu aña por duna un mucha un telefòn, Flavina a splika ku esei ta un pregunta ku e ta haña den kaso tur su presentashonnan. E ta kontesta semper “abo konosé bo yu mihó ku niun hende i kualke edat ku bo disidí na dun’e, bo tin di gui’e”. WHO ta pone komo konseho ta ku di 0-2 aña nada di pantaya/screen, I ta konsehá esaki pero e muchanan no por ku esei. Ta konsehá te ku 2 ora pa dia asta na e tinernan. E sa hasi den su lèsnan sierto ehersisio kaminda e hóben ta wak den su telefòn su oranan riba pantaya i nan mes ta spanta di esaki. Por mira kuenta di 13, 14 ora pa dia i e hóben ta masha orguyoso di esei. Tin bia e hóben ta spanta ora e mes mira kuantu ratu el a pasa riba pantaya. I ora e puntra nan kiko nan lo a hasi na su lugá, nan lo a bis’e tarea di skol. Ounke tambe mester tene kuenta pa kiko e mucha ta usa su pantaya. Tin ta us’e pa lesa buki, otro pa siña kos pero ta djis skrol so sin noshon di tempu, bo mester ta konsiente kiko bo ta yena bo mes kuné. I nada di mas no ta bon. Tabatin investigashonnan hasí pa Büro di Statistik ku ta papia di un mucha na skol di fundeshi ku ta 14 ora riba pantaya. I si e mucha ei ta bai skol, e ta yega kas 2 or i ta riba telefòn 6 ora, ya por komprondé ta kon largu e ta besig. Ki ora el a sosegá, ki ora el a hasi deporte, ki ora el a hasi tarea di skol. Tin ora bo no sa kiko bo no sa te ora bo haña sa. Kisas wak den telefòn di e yu òf den bo mes telefòn pa sa ki ehèmpel bo ta dunando komo mayor. E mucha mes ta bisa ku si su mama ta riba telefòn, dikon e no por ta riba telefòn tambe. Ta un kadena di kos relatá na otro, ku mester atendé tur.
Aktua preventivo
Flavina a menshoná na prinsipio di e entrevista aki ku konsientisashon riba uso di media sosial i atendé ku telefòn/pantaya mester drenta skol. El a bisa ku e ta keda hopi aserka i e sa bai skol hopi entre otro skol spesial. Hopi bes e no ta preventivo pero pasobra algu a pasa. I loke e ta eksperensia hopi ku nan ta yam’e ora sea tabatin bullying òf un potrèt a ‘leak’ loke ta nifiká sea un potrèt sunú òf algu asina a lèk den un grupo. El a yega di hañ’e asta ku mucha di grupo 8 ku no a ni yega skol sekundario. Ta un lástima ku ta ora algu pasa ta yam’e. I p’esei e ta haña i tin skol tambe ta haña ku e mester subi kuríkulo. Flavina ta konsiente si ku gobièrnu ta hopi besig awor aki kaminda a duna maestronan entre otro tablet i e por imaginá ku nan ta besig. El a bisa ku nan ta den kòmbersashon i e kos mester kana den un sekuensia pa e keda kla. Na Ulanda ya a hinka esaki den nan kuríkulo.
Adoptá un skol òf klas
Un di e metanan dikon Flavina a lanta Fundashon Konsiente ta pasobra tin skol ta bis’e ku nan no tin fondo pa haña e lèsnan awor aki. E tin hopi idea i ke hasié ku sektor partikular ku ta adoptá un skol òf klas i asina tur mucha por haña e lèsnan. Tin mas Media Coach na Kòrsou pero hopi ta trahando na un kompania. Den su kaso e tin un grupo ta trahando kuné ku ta bai e skolnan i duna e lèsnan aki. Tin hopi skol na Kòrsou i su deseo ta pa e konosementu aki i e empoderamente aki tei serka tur hende i tambe 60+. No solamente kon ta atendé ku telefòn pero pa ora topa e kosnan aki kon ta reakshoná, esta kon e mente ta traha. Flavina ke pa propagandanan inovativo i moderno ku ta keda papia ripití. Pa esei e mester di un kooperashon ku gobièrnu pa un kampaña nashonal. E ke pa e hende sa ku no ta djis duna telefòn pero pa ta envolví. Tin investigashonnan afó hasi ku muchanan di 15, 16 i 17 aña ta dunando nan mayornan falta ku no a guianan sufisiente i a laga nan pèrdè nan tempu riba telefòn. E responsabilidat ta serka nos komo mayor pa kiko ta e riesgo i kon ta mitigue. Unda e balansa ta. E mayor mester duna e ehèmpel pero e tin di eduká su mes. Kon ta usa telefòn, ki ora. E sa ku tin mucha ta hala atenshon di su mayor ku ta kore den tráfiko ku telefòn den man. I si ta asina kon ke pa e mucha sigui nos reglanan. E mayor mester krea e balansa pa e mucha lanta mas seif posibel.
Krea profil online
Konsiente a kuminsá komo proyekto promé ku Covid i despues bisa un fundashon. Ora wak e desaroyo riba media sosial, Flavina ta haña di e agresividat i agreshon a mira mas di hende ku hende. Un progreso si ku e ta mira ta ku promé e medianan tambe a bai online, por mira hende ta papia palabra malu den e live nan pero esei e medianan no ta aseptá mas. Kompanianan a kuminsá para ku no ta tolerá ku hende ta papia malu riba su plataforma. Nos komo adulto individual si e no sa ku e hende a lubidá ku e ta kreando su profil online asina, òf ta kiko nan ta besig kuné. Hende tin di tene kuenta ku departamentunan di rekurso humano ta buska pa sa ken e hende ta riba media sosial, pero skolnan tambe a kuminsá ta hasié. Mester siña nos muchanan empatia pa ora tin bringamentu no kue telefòn i graba pero e ehèmpel ku e mucha ta haña ta ku ora tin aksidente promé kos ku nos komo adulto ta hasi ta kue nos telefòn i graba. Na tur nivel i edat nos mester ta konsiente, tantu offline komo online.
Krea e relashon di komunikashon i konfiansa ku e yu
Pa e próksimo 10 aña Flavina a bisa ku su pashon ta den loke e ta hasiendo aki. El a kuminsá duna lès na Boneiru tambe dor di un mucha ku a mata kurpa pa cyber bulling. E ta traha ku gobièrnu i tambe ku polis i e ta spera ku mas di e kosnan riesgoso ta bin riba media pa hende sa kiko ta pasando. E ta spera ku aki 10 aña tin mas hende konsiente promé duna e mucha un telefòn. Flavina ta spera hende lo ta muchu mas konsiente no pa e kos negativo so pero positivo tambe. E ta bisa ku e muchanan ke papia pasobra el a eksperensiá esei den klasnan. I e mayor tambe mester logr’e pa asina bira krítiko. Papia diariamente ku e yu pa asina krea e relashon di komunikashon i konfiansa pa si algu bin bèk semper nan bin bèk.
Excellente analyse et explications claires concernant «Usa Media Sosial konsientemente – èxtra». En complément de ce sujet, je vous recommande vivement de jeter un œil à https://afk-spins.ch/bonus/. Bravo pour ce partage de qualité!