SAO PAULO, BRAZIL, AFP.- E vakuna desaroyá pa China, Coronavac a resultá 50% efikas despues di ensayonan na Brasil, segun indikashon di e organisashon na enkargo di e produkshon den e pais Suramerikano djamars.
Tur trahadó di salú ku tin kontakto direkto ku pashèntnan ku Corona vírus lo haña e vakuna Coronavac.
Instituto Butantan a reiterá siman pasa ku e vakuna ta 78% efektivo i lo prevení kasonan leve ku mester di tratamentu i a mustra di ta 100% efikas pa trata kasonan mas severo.
E vakuna ta 50% efikas i lo prevení pashèntnan di haña e vírus, inkluyendo kasonan leve, pero no esnan asintomátiko.
E ensayo a inkluí 12.500 voluntario i no a reportá ninga efekto atverso òf reakshonnan alérgiko.
Ounke e vakuna ta surpasá e mínimo imponé pa World Health Organization, esaki ta muchu ménos kompará ku e vakunanan produsí pa Moderna (94%) i Pfizer/BioNTech (95%).
Brazil a reportá mas di 203.000 morto relashoná ku COVID-19 i mas di ocho mion kaso entre su poblashon di 212 mion hende. Ainda e ministerio di salú mester dibulgá ki dia ta kuminsá ku e programa di vakuna nashonal.
