WILLEMSTAD.- Minister di Enseñansa, Siensia, Kultura i Deporte, Sithree van Heydoorn tabata for di 24 di yüni riba un biahe di trabou na Colombia. E minister ta regresá Kòrsou dia 28 di yüni. Ta trata di un bishita formal na gobernadó di Barranquilla. Tambe Van Heydoorn a hiba deliberashon ku representantenan di “Servicio Nacional den Aprendizaje” siguí pa un bishita di sera konosí na un skol di basketbòl lokal.
E minister a bishitá e organisashon ku ta organista e Karnaval iróniko di Barranquilla. Esaki a tuma lugá na nan ofisina yamá “Casa del Carnaval”. “Casa del Carnaval” a ekspresá e deseo di duna Kòrsou sosten a base di nan eksperensia.
Algu ku e minister a apresiá i indiká di lo hasi uso di e aserkamentu aki. Durante e bishita minister a interkambiá eksperensia tokante e manera ku ta organisá karnaval na Kòrsou i na Barranquilla. Loke a sobresalí ta e manera strukturá i sostenibel ku Barranquilla ta organisá su karnaval.
“Akinan Karnaval no ta solamente un fiesta kultural, sino un industria kultural ku un impakto ekonómiko enorme. Organisashon di Karnaval ta sosodé 365 dia di aña.” E meta di Van Heydoorn ta pa yega na un Karnaval mas strukturá, sostenibel i aksesibel pa tur hende na Kòrsou, esta un Karnaval ku por sigui krese i kontribuí na kultura i ekonomia di Kòrsou.
Tambe Van Heydoorn a reuní ku Iván Urquijo Osorio, direktor di INDESPORT Atlántiko na Barranquilla. Huntu ku su kolaboradó, Gianluca Bacci, a dialogá habrí i fruktífero tokante posibel kolaborashon entre Kòrsou i Colombia, spesialmente ku Departamento di Atlántiko, den e área di deporte. A invitá INDESPORT pa bishitá Kòrsou durante ‘Siman Internashonal di Deporte’, un tremendo plataforma pa fortifiká lasonan regional. Van Heydoorn a indiká: “Mi meta ta pa duna tur siudadano di Kòrsou oportunidat igual pa partisipá den deporte, i pa hasi deporte mas aksesibel pa tur hende. Tambe, mi ke sigui fortalesé relashonnan stratégiko ku partnernan lokal, den region, i den Reino.”
Banda di Van Heydoorn, minister di Desaroyo Sosial, Labor i Bienestar, Charetti America-Francisca tambe ta den eksterior. E minister a hiba un bishita di trabou na Hulanda di 23 di yüni te ku promé di yüli. Durante su bishita e minister lo partisipá na un enkuentro riba inovashon den e manera kon pa atendé ku violensia doméstiko i abusu kontra di mucha. Tambe e minister lo ta presente na selebrashon di Dia di Bandera na Den Haag.
Parlamentario i vise presidente di parlamento, Ramon Yung (MFK) lo representá parlamento di Kòrsou na e mesun selebrashon di Dia di Bandera. Parlamento di Kòrsou a risibí invitashon di minister plenipotensiario di Kòrsou, Carlson Manuel pa ta presente na e selebrashon dia 29 di yüni awor. Presidente di parlamento, Fergino Brownbill no por asistí na e invitashon na Hulanda debí ku e ta na St. Maarten pa atendé e kumbre ku tin pa presidentenan di parlamento.
Teniendo kuenta ku Yung ta na Hulanda pa un biahe privá, Brownbill a proponé pa prolongá Yung su estadia ku 2 dia mas pa asina e por atendé na e selebrashon. Yung lo regresá Kòrsou dia 30 di yüni awor. Tambe parlamento lo manda un personal di griffie Hulanda pa asistí Yung durante di e selebrashon.
