Muchanan riba un plenchi durante erupshon di e volkan Fuego
SAN JUAN ALOTENANGO, GUATEMALA, AFP.- Vários persona tabata kedando den refugionan despues ku nan a keda evakuá di nan bario, pa motibu di un erupshon potente di un volkan djaluna. Mayoria persona evakuá tabata biba na pia di e volkan, 35 kilometer leu di e kapital di Guatemala.
E volkan di mas aktivo di Sentroamerika a drenta den e fase di erupshon djaluna mainta. Den oranan di anochi e intensidat a oumentá sakando laba i kolumnanan diki di gas i shinishi.
E aktividat di e volkan a baha di intensidat djamars. Pero e habitantenan ta kòrda un erupshon fuerte di 3 di yüni 2018, kual a laga 215 morto i kasi e mesun kantidat di personanan pèrdí.
Vários famia, mayoria ku mucha, a keda trasladá pa refugionan na sùit di Escuintla. Outoridat lokal a indiká ku e kantidat di personanan evakuá ainda no ta konosí.
E ministerio di Edukashon a duna òrdu pa suspendé tur lès te próksimo aviso den tres munisipio serka di e volkan.
