Apesar di un akuerdo pa un periodo di pas, Israel ta sigui ataká den teritorio palestino i ta referí na “figuranan sospechoso” riba ken nan ta tira. Entre esnan ku a pèrdè nan bida ayera ta figurá un mucha palestino di nuebe aña.
JERUZALEM (AFP).- Atakenan israelí riba Gaza a mata sinku persona, entre nan un komandante di Hamas i un mucha hòmber di nuebe aña. Apesar di e akuerdo for di òktober último pa stòp ku e guera, e teritorio palestino ta sigui ta víktima di atakenan kontinuo di parti di Israel. Tantu Israel komo Hamas ta akusá otro di ta violá e periodo di pas.
E agensia di defensa sivil di Gaza a indiká ku kuater persona a muri ayera i otro seis a resultá heridá ora ku un drone a tira dos misil riba un outo den e bario wèst di Al-Rimal, den e siudat di Gaza. Un fuente di seguridat gazatí a identifiká dos dje víktimanan komo e komandante di Hamas Iyad al-Shanbari i su yu Salah. No a menshoná e otro personanan i o tabatin reakshon inmediato di Hamas.
Ehérsito israelí a duna di konosé ku “korektamente el a ataka un terorista” i ku mas despues lo duna detayenan. Den un otro insidente, Defensa Sivil a informá ku e yu hòmber di nuebe aña Adel al-Jajjar a muri “ora ku un atake di drone israelí a bombardiá den parti ost di Jan Yunis”. Ehersito a señalá ku “un sospechoso den e zona den linia hel a aserká e tropanan, representando un menasa inmediato”, i a drenta den un edifisio, ku despues a keda ataká pa forsa aéreo.
Djaluna, servisionan médiko di Gaza a indiká di a risibí e kurpa di Ayham alOmari, di 15 aña, ku a muri pa tirunan den e área nort di Beit Lahiya. Ehérsito israelí a señalá di a tira despues di a identifiká “un sospechoso ku a representá un menasa”.
E guera a stòp pa gran parti den Gaza, pero e violensia a persistí ku por lo ménos 818 palestino ku a muri for di despues ku a kuminsá ku e periodo di pas, segun Ministerio di Salú di Gaza ku ta bou outoridat di Hamas i di kua su sifranan ta konsiderá komo konfiabel di parti di Nashonnan Uní.
