Riba e potrèt por mira e mònstertrùk’ despues dje aksidente ku a tuma lugá durante di un show na Popaya, provinsia Cauca na Colombia. Por lo ménos 2 persona a muri i 40 a resultá leshoná.
POPAYAN, Colombia (AFP).- Komo sinku morto i desena di hende heridá den un aksidente ku mònstertrùk den e siudat kolombiano di Popayán djadumingu último. Despues di algun akrobasia, un dje vehíkulonan a kuminsá saka chispa i a kue direkshon pa públiko. E resultado tabata di sinku morto, entre kua dos menor di edat, i desena di hende heridá.
Un señora a relatá e sekòndenan di teror ku el a biba huntu ku su yu hòmber. “E vehíkulo tabata bin riba nos pero mi no por a move. Mi tabata warda pa el a pasa riba mi”, segun el a relatá.
Filmashonnan a mustra e vehíkulo ta dal sírkulo riba e pista i pasa ku gran velosidat riba opstákulonan. Direpente por a tende gritu i kantidat di hende na kareda ora ku e vehíkulo a kue direkshon pa públiko. A referí na un kantidat di 40 hende ku a sufri leshon, ku sinku mucha den estado di salú hopi delikado ademas dje mortonan na e sitio.
“Tabata un tragedia pa kua no tin splikashon”, segun Miller Velarde, tawela di Hellen Velarde, un mucha di dies aña kende a muri na e sitio dje aksidente. Otro ñetu di e mesun Velarde ta den kondishon krítiko.
Alkalde dje siudat, Juan Carls Muñoz , a ordená pa habri un “investigashon riguroso” riba “un aksidente ku hamas mester a tuma lugá”.
