PEKIN, CHINA, AFP.- E 17 mion di abitantenan di e siudat di Shenzhen na sùit di China a keda kas ayera riba e promé dia di ‘lockdown’ debí na e brote di covid-19 ku a obligá nan di suspendé e aktividatnan di un fábrika di I-phone i a obligá tambe na imponé restrikshonnan riba otro siudatnan grandi manera Shanghai.

Outoridatnan di Shenzhen a anunsiá djadumingu medidanan nobo, na momentu ku a aparesé den e siudat brotenan relashoná ku e bisiña di Hong Kong, kaminda e vírus a kousa basta pániko.

E gigante taiwanes di elektrónika Foxconn, e provedor prinsipal di Apple, a anunsiá suspenshon di su operashonnan na Shenzhen pasobra e medidanan ta afektá funshonamentu di su fábrikanan.

Foxconn ku ta empleá míles di trahadó den e siudat a bisa ku e ta trasladá su produkshon pa otro sentronan. Shenzhen ta un di e 10 siudatnan chines den ‘lockdown’, entre nan tambe tin Dalian, Nanjing i Tianjin pega ku Pekin.

Outoridatnan a konta ayera 2300 kaso nobo den henter e pais. E dia promé a nota kasi 3400 kaso, e sifra mas haltu for di despues ku e pandemia a kuminsá.

LAGA UN KOMENTARIO

Please enter your comment!
Please enter your name here