Vehíkulo ta dal i saka okupante ku ta fayesé trágikamente

WILLEMSTAD.- Kòrsou ta registrá e di 7 morto den tráfiko di un forma kruel, despues ku un hóben den flor di su hubentut a pèrdè su bida, na momentu ku e vehíkulo den kual e tabata sintá, a dal den muraya, zuai i e hóben a sali for di e vehíkulo bai kai riba kaya.

Djasabra alrededor di dies pa ocho di anochi, sentral di Polis  a dirigí algun unidat pa Sta Rosaweg pa un aksidente di tráfiko, kaminda tin algun persona gravemente heridá.

Na yegada di e promé unidat, a topa un vehíkulo bastante destruí i un dama bentá riba kaya. Den e vehíkulo tabatin tres otro okupante.

For di investigashon ku polis a realisá na e sitio, a sali na kla ku shofùr di e vehíkulo aki tabata kore riba Sta. Rosaweg den direkshon di Schottegatweg-Oost ku un velosidat bastante haltu.

Na altura di Zuikertuintjeweg e lo mester a pèrdè kontròl riba su stür, baha for di kaminda na man drechi i bai dal kontra di un muraya.

Despues di e impakto aki e vehíkulo a zuai i saka e okupante ku tabata sintá patras di e shofùr, i bent’é riba kaya. Debí na e múltiple leshonnan ku e víktima a sufri, el a fayesé na e sitio.

Dòkter di polis un ratu despues a konstatá morto di Clavienna Rebecca Isidora, nasé na Kòrsou dia 31 di desèmber 1993.

E tres otro okupantenan ku a risibí heridanan di ménos gravedat, a keda transportá pa poliklínika pa tratamentu médiko. Investigashon den e kaso aki ta kontinuá.

SHARE

LEAVE A REPLY