LONDON, AP.- Venesia ta proponé pa desviá kruseronan grandi. Barcelona kier deklará guera na kualkier departamento pa periodonan kòrtiku.
E dos siudatnan ta den vanguardia di esfuersonan pa kombatí ekseso di turismo, ku ta alterá bida diario den e komunidatnan, peligrá edifisionan históriko i afektá tantu biaheronan komo residentenan negativamente.
“Turismofobia” ta un fenómeno kada biaha mas komun, spesialmente riba destinonan europeo ku ta risibí un kantidat apnormal di bishitante.
E fenómeno a bira asina grave ku e pueblo a pone bòrchinan manera “Tourists, go home” i “Turistanan ta terorista”.
“Esaki ta un yamada di atenshon”, segun afirmashon di Taleb Rifai, sekretario general di e Organisashon Mundial di Turismo, durante un konferensia resien na London.
E resentimentu di e residentenan ta oumentá segun turismo ta oumentá. OMT ta pronostiká ku lo tin 1.800 mion biahero internashonal pa 2030, kompará ku e 1.200 mion di 2016.
E tarifanan aéreo barata ta kontribuí na fasilitá e desplasamentu di mas hende i tambe tabatin un oumento masivo den e fluho di biaheronan di paisnan manera China.
Turismo ta e fuente prinsipal di trabou i ta influensiá ekonomia positivamente den mayoria pais. Turismo ta representá 10% di e produkto interno bruto anual i ta generá divisanan fuerte pa mayoria pais ku mester di esaki desesperadamente, manera Gresia.
Pero ademas di esaki, turismo ta afektá e kalidat di bida di residentenan di e destinonan mas apresiá, ku playanan demasiado yen, kasnan for di alkanse di residentenan lokal i kayanan kongestioná. Riba término largu, Turismo por afektá medio ambiente i sustentabilidat di e siudatnan manera un lugá pa biba i traha.