CARACAS, VENEZUELA (AFP).- Venezolanonan ayera a vota den un elekshon presidensial tenso, ku e atvertensia dje mandatario Nicolás Maduro ku lo e sòru pa respetá e resultado ofisial i e deklarashon di su prinsipal rival, Edmundo Gonzalez Urrutia, ku esaki lo defendé Venezuela “te ku e último voto”.
E elekshon di ayera ta disidí entre kontinuashon di chavismo, ku tin 25 aña na poder, òf e kambio primintí pa un oposishon uní despues di a keda marginá for di otro elekshonnan, inkluso e anterior presidensial di 2018.
Maduro, di 61 aña, i sintá for di 2013, ayera a sigurá ku “loke ku e árbitro elektoral disidí ta keda rekonosé, i no solamente rekonosé sino defendé”, refiriendo na Konseho Nashonal Elektoral, ku ta sostené su gobièrnu. “Mi ta rekonosé e árbitro elektoral, e boletinnan ofisial i lo mi sòru pa esakinan keda respetá”, segun e presidente.
Gonzalez Urrutia, di 71 aña i representante di e karismátiko lider popular opositor Maria Corina Machado, ku no por a postulá pa motibu di a keda inhabilitá polítikamente, a deklará ku e ta kla “pa defendé demokrasia te ku e último voto”.
“Nos tin konfiansa ku nos Forsanan Armá lo respetá e desishon di nos pueblo”, el a agregá.
Di su parti, Machado a adelantá ku ayera mèrdia te 1 or un 42.1% di esnan ku por vota a hasi esei, ku ta ekivalente na 9 mion persona.
“Nos ta mirando un partisipashon enorme i nos ta orguyoso di esei. “Nos ta konkretisando un soño i un lucha di libertat”, segun Machado a bisa na prensa promé ku el a vota na Caracas.
Konseho Elektoral tin 21 mion persona registrá ku por vota, riba un poblashon di 30 mion habitante. Pero ekspertonan ta kalkulá ku solamente 17 mion hende ku ta den e pais por vota i ku otronan a sali for di e pais.
Maduro ta buska un di tres mandato di seis aña na momento ku e pais ta den un krísis ekonómiko i humanitario severo, ku un situashon sosial ekonómiko ku a pusha mas di shete mion hende pa bandoná e pais, segun datonan di Nashonnan Uní.
“Pas òf guera”, Maduro a bisa algun dia pasá, bisando ku na su opinion ta esei ta hunga un ròl den e elekshon. Poko promé el a atvertí ku un triunfo di oposishon por kondusí na “un baño di sanger”, loke a keda fuertemente kritiká pa presidente di Brasil, Luiz Inacio Lula da Silva, tambe presidente chileno, Gabriel Boric, i otronan.
