Venezolanonan den un marcha di protesta ayera na Caracas, demandando un transishon polítiko den e pais.
CARACAS (AFP).- Sindikalistanan i trahadónan ayera a pidi dilanti di embahada di Merka pa Venezuela bini ku elekshonnan nobo i ahuste salarial na momento ku ta kumpli 100 dia ku a deroká e presidente Nicolas Maduro. Despues di kaptura dje mandatario iskierdista den un operashon militar norteamerikano den yanüari, Delcy Rodriguez a asumí e mando di forma transitorio. E ta goberná bou di preshon di presidente merikano Trump, kende a bisa ku ta su persona ta enkargá ku Venezuela i benta di petrolio venezolano.
Un man yen di manifestantenan a mobilisá te dilanti di embahada di Merka, den un zona luhoso dje kapital. E sede diplomátiko a reaktivá su operashonnan ku restablesimentu di relashon entre Washington i Caracas despues di shete aña. “Nos ke yama danki na e gobièrnu merikano pa a duna nos poko airu pa por hala rosea, pero awor nan mester kaba e trabou”, segun Victor Perreira a bisa na un empleado dje embahada. E manifestantenan a entregá vários petishon pa mehorá salario, pero tambe pa liberashon di prezunan polítiko i elekshonnan liber.
“Hopi lihé nos mester di elekshon”, segun Carlos Salazar, kordinadó di un koalishon sindikal. Oposishon venezolano ta eksigí pa Rdriguez konvoká elekshon awor ku tin “ousensia apsoluto” di Maduro, será na New York bou akusashon di trafikashon di droga.
“Awor gobiernu venezolano ta bou di tutela di merikanonan. Pues ta ku nan mester papia”, segun Carlos Saazar.
