CARACAS, AP.- E fiskal General di Venezuela a kondená 18 persona, entre otro seis militar i ocho indígena, pa e asalto kontra di un instalashon militar na sùit di e pais, kaminda a hòrta vários arma i granada.
Despues ku a anunsiá e proseso hudisial, e fiskal general Tarek William Saab a bisa djabièrnè na prensa ku e detenidonan a wòrdu akusá ku konspirashon pa destruí e forma di polítika republikano, terorismo i ladronisia di arma di kandela entre otro.
E 18 personanan a wòrdu arestá den desèmber despues di e asalto di e luna aki den un estado na sùit di Bolívar, serka di frontera ku Brasil. Esaki a laga un sòldat morto.
Saab a indiká ku outoridat ta buskando 15 persona impliká den e echo i a kondená e gobièrnu di Brasil ku a duna refugio na sinku militar vinkulá ku asalto. E fiskal no ta di akuerdo ku Brasil su desishon i a bisa ku e Fiskal general di Venezuela a inisiá e trámitenan pa su ekstradishon.
Presidente Nicolás Maduro i otro funshonarionan a impliká vários opositor den e kaso, inkluyendo e diputado Gilber Caro, detené den luna di desèmber na Caracas.
Maduro a akusá e mandatario brasilero Jair Bolsonaro di sostené e asaltantenan di e unidat militar i ta eksigí pa Perú detené e opositor venezolano Villca Fernandez.
