Entieronan ta tumando lugá na Venezuela, kaminda te ku ayera di forma ofisial a reportá 1.700 morto. Pero ketu bai tin míles di hende pèrdí.
CARACAS (AFP).- Na e entrada di un santana den Caracas un kantidat grandi di famia pará pa kremashon di víktimanan di e temblor ku a sakudí Venezuela dia 24 di yüni. Den Cementerio General del Sur e dos fòrnunan ta funshoná sin stòp pa atendé ku e demanda despues di dos temblor ku magnitut di 7.2 i 7.5, ku a kousa 1.700 morto.
E santana públiko, ku normalmente ta sera 4or di atardi, no solamente ta purba na dòbel e kapasidat di morto ku ta atendé, pero tambe e trabounan ku mester tuma lugá. Segun un trahadó, e trabounan lo sigui sigur te mei anochi.
“Esaki ta djis e komienso”, segun Freddy Rey, kende ta enkargá ku e santana. E promedio di entiero entre djabièrnè i djasabra último tabata entre 60 pa 70 persona pa dia.
Durante dje trabounan ayera direpente a surgi un gritu “Mama, mi ta stima bo” i tabata un hóben ku a lòs e gritu na momento ku famianan di Emir Perez tabata dera esaki huntu ku su kasá i dos yu.
Miéntras ku kremashon ta tuma lugá, kantidat grandi di famia ta sigui karga speransa ku nan sernan kerí ku ta pèrdí for di siman, tòg ta na bida.
