Forsanan Armá venezolano a rekrutá miembronan nobo pa tuma parti na ‘training’ militar den San Cristobal.
CARACAS (AFP).- Venezuela a kuminsá hasi ehersisionan militar na e isla Orchila, den parti zùit di Karibe, komo respuesta na e presensia di barkunan ordená pa Merka den e zona konsiderá komo un “menasa”. Merka a manda ocho barku den laman Karibe pa kombatí narkotráfiko i for di inisio di sèptèmber a eliminá tres barku ku supuestamente tabata trafiká ku droga, ku un saldo di 14 morto, segun e presidente Donald Trump.
E ehersisionan venezolano ta tuma lugá den un teritorio di 43 kilometer ku ta keda na 97 mia nóutiko dje estado di La Guaria, i serka kaminda ku Merka a interseptá un barku di piskadónan durante di ocho ora den wikènt último.
“Lo tin moveshon di defensa aéreo ku ‘drones’ armá, ‘drones’ di vigilansia i ‘drones’ supmarino. “Nos lo implementá akshonnan di guera elektróniko”, segun e minister di defensa, Padrino Lopez, señalando ku Venezuela ta defendé su mes “kontra dje bos menasante, vulgar di Merka”.
Di su parti, Merka ta akusá e presidente venezolano, Nicolas Maduro, di supuestamente ta enkabesá organisashonnan di droga i a ofresé un rekompensa di 50 mion dòler pa su kaptura. Venezuela ta rechasá e akusashonnan di narkotráfiko.
E Ministerio di Interior, Diosdado Cabello, mas trempan a informá ku pa loke ta bai 2025 nan a konfiská mas ku 60 tòn di droga.
Siman pasá presidente Maduro a ordená pa mobilisá 25.000 efektivo na e fronteranan i a hasi apelashon riba e poblashon sivil pa uni nan mes na reserva militar. Gobièrnu venezolano a pidi un investigashon despues ku e promé barku a keda ataká dia 2 di sèptèmber. Relashoná ku e tres barkunan, el a puntra: “tin un hende ku a mira e droga? ”Nan a bisa ku e di dos boto tabatin fentanilo. “Fentanilo, for di aki, for di Venezuela? “Ta hopi difísil pa kere e kosnan aki”, segun e minister venezolano Cabello.
