CARACAS (AFP).- E kampaña pa elekshon regional i parlamentario di 25 di mei prosaiko na Venezuela a kuminsá ayera ku aktonan organisá pa esnan na fabor dje gobièrnu di Nicolas Maduro i algun dirigente di oposishon ku a plama for di otro.
Mas ku 50 partido, den su mayoria ku simpatia pa chavismo, lo tuma parti na e elekshon di kua e prinsipal aliansa opositor, Plataforma de la Unidad Democrática, a hasi un yamada di bòikòt.
Apesar di esei, un minoria di miembronan dje aliansa, enkabesá pa èks-kandidato presidensial Henrique Capriles, lo tuma parti na e elekshon.
“Awe lo duna inisio ofisial na e periodo di kampaña elektoral”, segun Konseho Nashonal Elektoral (CNE) den un komunikado lesá na e kanal estatal.
Pero te ku ayera nochi, CNE – ku a denunsiá iregularidat den elekshon presidensial di aña pasá i ku a stroba konteo di voto – no a publiká e resultadonan ofisial di elekshon presidensial miéntras ku ayera no a duna nòmber di kandidatonan.
Venezuela lo eligí miembronan di Parlamento, tambe di konsehonan legislativo i gobernadornan di 24 estado, inkluso pa promé biaha pa gobernashon dje teritorio Esequibo, un region di 160.000 km2 pa kua tin un disputa ku Guyana. E kaso akí aktualmente ta den Korte Internashonal di Hustisia.
