CARACAS, AP.- E hefe di Asamblea Nashonal i Lider opositor Juan Guaidó, a rekonosé djadumingu ku tin e posibilidat pa un konfrontashon entre e venezolanonan ku kier pa e yudansa humanitario drenta i esnan ku kier impedí esaki.
Guaidó a hasi su deklarashonnan miéntras e gobièrnu i oposishon ta forsegeá tokante entrega di e yudansa humanitario na e pais suramerikano. Asamblea Nashonal a hasi e petishon pa yudansa humanitario. E asamblea ku mayoria opositor ta kontra ku respaldo di Merka i Colombia, entre otro paisnan.
Guaidó a ekspresá su konfiansa den e “sivilidat” di e venezolanonan i su duda ku kualkier persona lo sakrifiká su bida na benefisio di e gobièrnu sosialista venezolano.
Venezuela ta pasando dor di e krísis polítiko i ekonómiko mas grave den su historia ku un hiperinflashon di shete dígito i un reseshon severo. E skarsedat di kuminda i medisina entre otro, a generá un migrashon masivo di venezolanonan. Nashon Uní ta kalkulá ku tres mion persona a bandoná Venezuela.
E gobièrnu di Venezuela a rechasá e sosten, indikando ku no tin un situashon di emergensia na Venezuela. E pais ta akusá oposishon di inisiá un invashon militar.
Algun ratu promé, Guaidó a pidi e militarnan, kual ta e base di respaldo prinsipal di Maduro, pa permití e yudansa humanitario pa drenta. Ademas el a pidi pa e militarnan no sigui òrdu di e presidente.
E mando di forsa armá militar a ekspresá su respaldo na Maduro, pero vários ta duda ku esaki ta opinion mayoritario di e trupa, inkluyendo esnan ku no ta gana sufisiente kompará ku e militarnan den rango haltu.
E dirigente opositor a komentá ku den e próksimo dianan lo anunsiá kreashon di dos sentro kaminda por warda material i produkto. Un di e sentronan aki lo ta na Brasil i e otro riba un isla serka den Karibe.