Venezuela i Merka a start proseso pa restablesé relashon

CARACAS (AFP).- Venezuela i Merka ayera a start un proseso pa restablesé relashonnan diplomátiko despues di kaida di e presidente Nicolas Maduro, ku ademas a habri kaminda pa liberashon di kantidat di hende será pa motibunan polítiko. E kambio den e relashon di tormenta, interumpí for di 2019, ta inkluí un akuerdo pa reaktivá e industria petrolero venezolano, ku segun Trump a bisa ayera ta dun’e e derechi pa eligí e empresanan petrolero. Venezuela ta konta ku e reservanan di petroli mas grandi na mundu, pero ku un infrastruktura hopi malu.
Diplomátikonan norteamerikano ayera a yega Caracas pa evaluá un “reanudashon gradual” dje relashonnan, segun Departamento di Estado. E gobièrnu interino di Delcy Rodriguez tambe lo manda un delegashon pa Merka. E aserkamentu te ku awor no ta mustra un kambio di régimen, motibu pa kua Edmundo Gonzalez Urrutia, eksiliá na Spaña, ayera a pidi e “rekonosimentu eksplísito” di su viktoria den elekshon presidensial di 2025, ku na su opinion Maduro a hòrta for di dje.
Su mentor, e lider di oposishon i Premio Nobel di Paz, Maria Corina Machado, otro siman lo keda risibí pa Trump. Na un promé instante Trump a poné un banda pa su plan ku Venezuela, ku a kai den un di su pió krísisnan ekonómiko durante e gobièrnu di Maduro. Komo parti pa drecha e relashon, e gobièrnu interino a kuminsá liberá esnan detené pa motibunan polítiko.
Oposishon a reportá komo un dozein di prezu pone den libertat, inkluso e eks-kandidato presidensial Enrique Marquez i e aktivista Rocio San Miguel. Te ku mei mei dje siman aki, e organisashon di derechinan humano Foro Penal a referí na 806 prezu polítiko den Venezuela. Gobièrnu di Venezuela djaweps último a anunsiá ku un kantidat di prezu lo haña nan libertat. Debí na esaki, Trump ayera a duna di konosé di ta anulá un “di dos atake” riba Venezuela, pero famianan ya a kuminsá protestá riba e tardansa ku ta surgi pa pone e prezunan den libertat.