CARACAS.- Informashon ekstraofisial for di Venezuela ta indiká ku lo habri frontera pa transporte entre Venezuela, Kòrsou, Aruba i Boneiru. E informashon ku EXTRA ta dispone di dje ta indiká ku por spera ku dentro di algun tempu outoridatnan venezolano lo por anunsiá ku ta habri frontera ku islanan di eks Antia. Punto ta ku ta Venezuela a sera frontera ku e islanan aki basá riba supuesto krísis diplomátiko na febrüari 2019.

E informashon ta indiká ku e intenshon primordial ta pa restablesé e relashon komersial ku e islanan. Ta bon konosí na Venezuela ku e islanan tabata dependé praktikamente di so pa fruta i berdura fresku for di Venezuela. E preis di e produktonan for di Venezuela ta mas kumbiniente kompará ku e produktonan for di Colombia i Santo Domingo.

Tin indikashon ku awe djarason 23 di yüni un diplomátiko ulandes lo reino ku representantenan di Fedecamaras na estado Falcon.

Na Kòrsou e proseso di bakunashon ta hopi avansá. Ya kaba Kòrsou a surpasá 88 mil hende bakuna for di un poblashon di 150 mil habitante, miéntras ku na Aruba ya kaba a yega 67% di e total di 107 mil habitante riba e isla. E situashon na Venezuela sinembargo ta diferente, esei por saka for di fuentenan di notisia venezolano. Ta punto ku mester tene kuenta kuné na momentu di posibel habrimentu di frontera di parti di Venezuela.

Otro punto di atenshon ta e echo ku awendia tantu Kòrsou komo Aruba ta eksigí visa pa venezolanonan pa drenta e paisnan aki. Tambe ta asina ku venezolanonan mester paga seguro na momentu di transporte di merkansia i esaki ta motibu di preokupashon serka empresarionan venezolano.

 

LAGA UN KOMENTARIO

Please enter your comment!
Please enter your name here