CARACAS, AP.- Asamblea Konstituyente a aprobá un dekreto kaminda esaki a asumí e funshon legislativo di Kongreso, kontrolá pa oposishon. Esaki ta agudisá e krísis di poder mas ainda den e pais.
E konstituyentenan ofisialista a vota e medida ku ta permití nan “legislá riba tópikonan dirigí direktamente pa garantisá preservashon di pas, seguridat, soberania, sistema sosioekonómiko, finansiero, asuntunan di estado i preminensia di derecho di e venezolanonan”.
E dekreto ta permití nan pa dikta aktonan parlamentario den forma di lei pero no ta impedí kongresistanan pa kontinuá ku reunionnan.
Kongreso a rechasá e dekreto i a konsiderá e akshonnan di Asamblea Konstituyente komo ilegal i inkonstitushonal.
“E gòlpi di Estado di ANC (Asamblea Konstituyente” ta e profundisashon di akshonnan ku e régimen ta ehersé”, asina Asamblea Nashonal a bisa riba su kuenta di Twitter. Kongreso a organisá un seshon i a invitá tur venezolano pa partisipá den e akto.
Den mart, Tribunal Supremo di Hustisia a diktá un sentensia kaminda esaki ta asumí ophetivonan legislativo di Asamblea Nashonal.
Konstituyente a emití e dekreto despues ku ofisilista Asamblea Nashonal a ninga di paresé dilanti e kuerpo nobo, konsiderando esaki komo “froudulento”, pa logra ratifikashon den nan kargonan.
“Nos ta duna boso un lès históriko”, segun indikashon di presidente di Asamblea Konstituyente, Delcy Rodriguez, sigurando ku e kongresistanan ta “obligá” pa supordiná na e kuerpo aki.
