CARACAS, AP.- E presidente venezolano Nicolás Maduro a afirmá djabièrnè ku outoridat no a detené e lider opositor Juan Guaidó dor ku korte no a duna òrdu pa esaki, pero a atvertí ku e dia “lo yega”.
E gobernante sosialista a hasi e komentario durante un reunion ku prensa internashonal tres dia despues ku Guaidó a regresá Venezuela despues di un gira den Merka i Europa. E lider opositor a bandoná e pais desafiando un òrdu hudisial ku ta prohibié pa sali di Venezuela.
Apesar di e òrdu, funshonarionan di migrashon a permití pa Guaidó drenta e pais despues ku el a aterisá den un buelo komersial prosedente di Portugal na e aeropuerto internashonal di Venezuela.
Ta di dos biaha ku Guaidó a biaha for di Venezuela apesar di e prohibishon. Na ámbos okashon, el a wòrdu permití pa drenta e pais bèk sin problema.
Maduro a akusá e gobièrnu merikano di kousa morto i sufrimentu entre e pueblo venezolano den añanan resien ku su sanshonnan.
Maduro a atmití tambe ku e sanshonnan a oblig’é pa tuma desishonnan manera permití sirkulashon di dòler den e ekonomia venezolano. Esaki ta algu kontra ideanan di Maduro su predesesor, Hugo Chavez kende a fayesé.
Kasi mitar di e pueblo ta hasi kompra ku dòler merikano. E dolarisashon a yuda impulsá ekonomia di e pais, pero ainda ta un problema pa esnan ku no tin akseso na dòler.
Washington a introdusí un serie di sanshon, prohibiendo tur merikano i empresanan pa hasi negoshi ku e gobièrnu di Maduro.
