Marco Rubio, hefe di diplomasia di Merka.
WASHINGTON (AFP).- E hefe di diplomasia norteamerikano, Marco Rubio, a menasá Venezuela ku “sanshonnan nobo i fuerte” si su presidente, Nicolas Maduro, no aseptá “un fluho konstante di buelonan di deportashon” di migrantenan venezolano.
“Venezuela ta obligá na akseptá su siudadanonan repatriá for di Merka. “Esaki no ta un tema di debate ni negoshashon. Tampoko nan ta meresé ningun rekompensa”, segun Rubio a atvertí riba ret sosial X.
“Den kaso ku e régimen di Maduro no aseptá un fluho konstante di buelonan di deportashon, sin mas èksküs ni tardansa, Merka lo imponé sanshonnan duru i ku ta sigui krese”, segun e sekretario di Estado a agregá.
E gobièrnu di presidente Donald Trump ta realisando un operashon di ekspulshon di migrantenan den situashon iregular i ta eksigí pa e paisnan kolaborá.
Despues di a regresá White House dia 20 di yanüari, e republikano a manda su korespnsal spesial Richard Grenell Caracas pa negoshá e repatriashon di venezolanonan.
Simannan despues, rabiá ku e lider chavista pa no a kumpli segun e ritmo akordá di buelonan, a revoká e lisensia ku ta permití e petrolero norteamerikano Chevron operá na Venezuela.
E tenshon a krese wikènt último despues ku Trump a hasi uso di un lei di guera di 1798 kontra di e geng venezolano Tren de Aragua i a manda 238 venezolano pa keda será den prizòn na El Salvador.
