CARACAS, AP.- Un multitut a protestá djasabra na Venezuela, den un protesta organisá pa presidente interino i lider opositor Juan Guaidó pa eksihí kambio den e pais suramerikano, ku ta pasando dor di un krísis ekonómiko i sosial.
Den un diskurso, Guaidó a pidi e partidarionan pa sigui protesta riba kaya durante e próksimo dianan i a menshoná e agitashon sosial resien na Bolivia, kaminda 18 dia di protesta a provoká renunsia di presidente Evo Morales, un aliado estrecho di e gobièrnu sosialista di Nicolás Maduro.
Guaidó kier revitalisá e kampaña pa obligá e mandatario sosialisá pa renunsia. “Mi lo sigui marcha i protestá. Mi ta sinti ku mi debe mi yunan un mihó pais. Mi kier demostrá ku e lucha pa demokrasia no a kaba”.
Manera sa sosodé normal, e siguidónan di presidente Maduro tambe a marcha desde tres punto di e siudat, rumbo pa e palasio di gobièrnu, den sentro di Caracas, pa sostené nan lider i defendé e “Revolushon Bolivariano”.
Guaidó ta insistí ku tur hende mester partisipá pa logra renunsia di Maduro. Mas di 50 pais ta rekonosé e lider opositor komo lider legítimo di Venezuela i aparte di esaki e lider tin respaldo amplio di venezolanonan ku ta kulpa Maduro pa e krísis polítiko i ekonómiko ku ta asotando Venezuela.
