MARACAIBO, AP.- E petroli di Lago Maracaibo a hasi Venezuela un di e nashonnan mas riku den Suramérika. Pero e opositornan ta insinuá ku dos dékada di sosialismo a kaba ku e industria di petroli, kual ta produsiendo muchu ménos ku 20 aña pasá. E gobièrnu ta kulpa Merka su sanshonnan pa e krísis. Mas o ménos 4,5 mion venezolano a bandoná e pais pa buska un mihó futuro na Colombia, Perú i Ecuador.
E lider opositor Guaidó a deklará komo presidente den yanüari i a primintí ku e lo kaba ku e gobièrnu sosialista, pero su kampaña a stanka, apesar ku e tin sosten di mas di 50 pais, inkluyendo Merka, kual a apliká un serie di sanshon severo kontra Venezuela pa forsa retiro di Maduro.
E presidente no a entregá.
Residentenan na Maracaibo a indiká ku nan a stòp di partisipá den protestanan polítiko dor ku nan ta teme pa nan seguridat i no ta konfia e pais su lidernan.
