CARACAS (AFP).- Gobièrnu di Venezuela ayera a kibra relashon ku Paraguay pa motibu di sosten dje pais ei na e opositor Edmundo Gonzalez Urrutia, rival di Presidente Nicolás Maduro, den elekshon di 28 di yuli di aña 2024, ku ta denunsiá ku tabatin froude.
“Venezuela a disidí, den pleno ehersisio di su soberania, pa kibra relashon diplomátiko ku Republika di Paraguay i ta anunsiá retiro inmediato di su personal diplomátiko akreditá den e pais”, segun Kansiyeria a bisa den un komunikado komo reakshon riba un kombersashon telefóniko den kua e Presidente paraguayo, Santiago Peña, a ekspresá su apoyo na Gonzalez Urrutia.
Gobièrnu venezolano “ta rechasá di forma kategóriko e deklarashonnan dje presidente di Paraguay, Santiago Peña, kende ignorando e derechi internashonal i e prinsipio di no intervenshon, ta hasi uso di práktika frakasá ku ta rekordá e polítika di fantasia dje ‘Grupo de Lima’ ku su aventura ridíkulo yamá Guaidó”, segun na ta bisa den e komunikado.
Caracas na aña 2019 a kibra relashon ku Merka pa su apoyo na e opositor Juan Guaidó, kende a enkabesá un gobièrnu interino simbóliko ku a keda respaldá pa un kantidat di komo 50 gobièrnu.
Despues ku internashonalmente a kuestioná e proklamashon di Maduro, gobièrnu venezolano a retirá e personal diplomátiko di Argentina, Chile, Costa Rica, Perú, Panamá, República Dominicana i Uruguay.