CARACAS (AFP).- Gobièrnu di Venezuela ayera a akusá Merka di tin “sekuestrá” un kantidat di 18 mucha despues di a separá nan for di nan mayornan durante dje proseso di deportashon ehekutá pa Washington. Segun e hefe di Parlamento, Jorge Rodriguez, e muchanan ta varia entre 1 pa 12 aña i a keda separá di nan mayornan, di kua mayoria ya ta na Venezuela despues di a keda deportá for di Merka.
“Nan a keda separá di nan mamanan, di nan mayornan, di famia i hibá na institushonnan kaminda nan no mester ta”, segun Rodriguez. El a agregá ku frekuentemente tin interkambio ku e gobièrnu di Donald Trump pa eksigí pa nan yega Venezuela. “Semper nos a bisa” pa duna nos e muchanan bèk.
Apesar di e relashonnan diplomátiko kibrá entre Benesuela i Merka for di 2019, e gobièrnu di
Trump a yega un na un akuerdo ku e gobièrnu di Nicolas Maduro pa deportá algun shen venezolano, despues di a akusá nan di ta “kriminalnan”.
Den aprel último Venezuela a denunsiá ku un mucha muhé di dos aña a keda separá di su mayornan durante un proseso di deportashon di Merka pa Caracas i El Salvador. E mucha finalmente a yega Caracas den luna di mei.
Outoridatnan norteamerikano a bisa ku a separá e mucha for di su mayornan “pasobra tur dos ta miembronan di Tren de Aragua”, un gèn peligroso venezolano. E mama a nenga e akusashonnan ei.
