Avionnan di guera merikano stashoná na José Aporte de la Torre Airport, na Pto. Rico, for di unda ta lanta buelo ku ta yega te serka di kosta di Venezuela
CARACAS (AFP).- Ayera Venezuela a akusá gobièrnu di Trinidad & Tobago di a yuda den “robo” di un barku kargá ku petrolio venezolano ku Merka a konfiská siman pasá, den kuadro dje maniobranan militar di Washington den Karibe. Merka den ougùstùs a kuminsá ku un operativo anti-narkótiko den Karibe ku a konta ku apoyo dje promé minister trinidense, Kamla Persad-Bissessar, aliado di gobièrnu di Donald Trump.
Caracas a informá di tabatin “konosementu amplio riba e partisipashon dje gobièrnu di Trinidad & Tobago den e robo di petrolio venezolano” ku “e asalto di un barku ku tabata transportá e produkto stratégiko di Venezuela” dia 10 di desèmber. “E akto aki di pirateria ta representá un violashon grave di derechi internashonal i un agreshon dje prinsipionan di nabegashon liber i di komèrsio”, segun e teksto publiká pa e vise presidente Delcy Rodriguez.
Den un mensahe mandá pa AFP, Persad-Bissessar a bisa di no ta sinti su mes “molestiá pa e komunikado” di Caracas, i na mesun momento a pidi pa e gobièrnu venezolano “dirigí su kehonan serka presidente Trump”. E mandatario republikano a anunsiá siman pasá ku su pais a konfiská un barku di petrolio dilanti kostanan di Venezuela den un medida sin presedente den e krísis entre Washington i Caracas. E gobièrnu di presidente Nicolas Maduro a konsiderá esei komo “un akto internashonal di pirateria”.
Maduro den luna di òktober a suspendé tur akuerdo energétiko ku Trindad & Tobago, despues ku e isla a aseptá entrada di un barku di guera norteamerikano pa huntu hasi ehersisionan militar.
E minister di interior venezolano, Diosdado Cabello, a atvertí ayera den konferensia di prensa ku e akshonnan dje gobièrnu trinidense ta “pone e bon relashonnan den peliger, pero tambe ta hinka su mes pueblo den peliger”.
