CARACAS, VENEZUELA (AFP).- E Minister di Interior di Venezuela, Diosdado Cabello, a bisa ayera ku un total di 19 “mersenario” estranhero a keda detené den último lunanan pa supuesto relashon ku plannan pa deroká e presidente Nicolás Maduro despues dje kontroversial elekshonnan di 28 di yüli.
Sin duna detaye dje fechanan, Cabello a referí na “e kaptura di un grupo nobo di mersenario” di kendenan el a pone un relashon ku gobièrnunan di Spaña i Merka.
Entre esnan arestá ta figurá e norteamerikano Gregory David Weber, kende e gobièrnu venezolano ta relashoná ku operashonnan kontra di institushonnan estatal, komo tambe e paramédiko David Gutenberg Guillaume, kende segun Cabello tabatin e mishon di “duna yudansa den kaso di heridonan den aktividatnan terorista”.
Jonathan Pagan González, otro norteamerikano, “a keda detené den Zulia (wèst) i ta keda akusá di a buska pa atentá kontra di Maduro i otro funshonarionan haltu.
Tambe el a identifiká Jorge Marcelo Vargas, di nashonalidat merikano i bolivariano, kende al a sigurá, “a keda kapturá ora ku e tabata saka potrèt den refinerianan dje pais. Mas aleu den e grupo tin “vários kolombiano”, un peruano i un libanes.
Tambe ta relashoná e detenidonan ku trafiká di arma for di Merka. Te awor a anunsiá ku a konfiská 500 arma.
Cabello dia 14 di sèptèmber a referí na detenshon di Wilbert Josep Castañeda, “militar aktivo” di Merka i “hefe” dje plan, i otro dos norteamerikano, David Estrella i Aaron Barren Logan, komo tambe dos spañó, dos dia despues a konfirmá aresto di un di kuater merikano.
“E merikanonan detené na Venezuela ta den hopi bon kondishon, nan ta mihó ku esnan detené den Guantámano. Ta respetá derechi di tur e siudadanonan estranhero”, segun Cabello a bisa.
