CARACAS, AP.- Outoridat venezolano a detené dos integrante di e kuerpo di seguridat di e lider opositor Juan Guaido, un medida pa pone preshon riba e gobièrnu su atversario respaldá pa Merka, apesar ku ámbos parti tin kombersashon pa resolvé e stankamentu polítiko den e pais suramerikano.
Segun Diosado Cabello, e presidente di Asamblea Nashonal Konstituyente di Venezuela, e hòmbernan a purba bende kuater ama di kandela ku ta pertenesé na estado i kual a wòrdu usa durante e lantamentu militar frakasá dirigí pa Guaido riba 30 di aprel. E minister pa Komunikashon i Informashon di Venezuela, Jorge Rodriguez, a bisa ku e intento di benta di arma ta reflehá e nivel di engaño di e partido opositor.
Rodriguez a agregá ku gobièrnu lo presentá prueba pa e akusashonnan aki.
Guaido a tweet ku dos miembro di su ekipo, Erik Sanchez i Jasn Parisi a wòrdu detené na Caracas, miéntras ku nan tabata brindando seguridat na su famia. Guaido a spekulá ku outoridat lo inkriminá e hòmbernan aki ku prueba falsu, di mesun forma kon a hasi ku su hefe di despacho Roberto Marrero kende ta detené aktualmente.
Cabello i otro partidarionan klave di Maduro a realisá protestanan pa kondena e rapòrt ‘severo’ tokante e situashon na Venezuela, realisá pa e Komisario di Nashon Uni pa Derechi Humano, Michelle Bachelet. E oponentenan di e rapòrt a afirmá ku esaki ta relatá kasonan di tortura, abusu seksual i ehekushonnan ekstrahudisial di parti di forsanan di seguridat di gobièrnu, kual ta totalmente eróneo i tendensioso.
