Venezuela ta identifiká “restunan humano” resultado di bombardeo

Miéntras ku e proseso ta kanando pa identifiká e mortonan na Venezuela, famianan di algun shen prezu polítiko a ekshibí potrètnan di nan famianan kendenan ainda ta prezu, supuestamente.

CARACAS (AFP).- Na Venezuela nan ta trahando duru pa identifiká restunan humano hañá despues dje atake di Merka ku a provoká e kaida di Nicolas Maduro i den kua tabatin sigur 100 morto, segun e minister di interior Diosdado Cabello. Forsanan norteamerikano a bombardiá Caracas i tres estado serka dje kapital den mardugá di 3 di yanüari den un operashon ku a kaba ku kaptura di e presidente Maduro i su kasá. Den e atake ei 55 militar a pèrdè nan bida, inkluso 32 kubano ku mester a protehá Maduro.
“E eksploshonnan tabata asina fuerte ku tin hende di kua nan no sa unda nan ta”, segun Cabello den konferensia di prensa. “Hende asina batí ku a imposibel pa identifiká”, nan a keda na “pida pida”, segun el a deskribí. Polis sientífiko huntu ku dòkternan ta “hasiendo estudio pa mira e ADN di pida kurpanan humano” dje víktimanan den e atake norteamerikano, segun e poderoso dirigente chavista. Ta un “abusu i krímen serio ku nana kometé kontra di Venezuela na momento ku e hendenan tabata drumi. Nan a pèrdè nan bida sin sa di nada”, el a agregá.
Despues dje atake, e visepresidente venezolano Delcy Rodriguez a asumí funshon di forma temporal bou preshon fuerte di Donald Trump, kende a bisa ku e t’esun “enkargá” ku Venezuela. E presidente interino a start aserkamentu ku Washington de un esenario pa drecha e relashonnan, kibrá for di 2019.
Caracas ta den ambiente di kalma despues dje akshonnan di Merka. E filanan largu den supermerkadonan i na pòmpnan di gasolin a disparsé algun dia despues dje atake. “E pais ta trankil, e pais ta den pas, e pais ta bai bèk den situashon normal”, segun Cabello a bisa, agregando ku “nos mester sigui padilanti”.