Kamla Persad-Bissessar, presidente di Trinidad and Tobago.
CARACAS (AFP).- Venezuela ta konsiderá pa suspendé akuerdonan di gas i koriente ku Trinidad & Tobago, segun e ekipo petrolero dje pais, algun ora despues ku Port-of- Spain a risibí un barku di guera di Merka pa ehersisionan militar.
E vise presidente, Delcy Rodriguez, ku ta enkabesá e Ministerio di Petrolio, a señalá ku su despacho huntu ku e estatal PDVSA lo rekomendá presidente Nicolas Maduro pa kibra un akuerdo amplio di kooperashon firmá den 2015 i ku “konsekuentemente lo suspendé tur e akuerdonan di gas ku Trinidad & Tobago”.
E promé minister trinidense a reakshoná: “Nos no ta aseptá ningun chantahe di parti di e venezolanonan en buska di apoyo polítiko”, di akuerdo ku Kamla Persad-Bissessar den un mensahe. “Nos futuro no ta dependé di Venezuela i nunka esei tabata e kaso”.
Trinidad resientemente a risibí outorisashon norteamerikano pa eksplorá un área na Venezuela hopi serka dje frontera komun, apesar dje embargo vigente for di 2019. Maduro ainda no a hasi un deklarashon riba e punto ei. E relashon bilateral a deterior’é for di despues ku Persad-Bissessar a yega na poder ku un diskurso kontra di migrashon venezolano i ku ta hopi pareu ku e pensamentu na Washington.
Trinidad e siman akí a risibí e barku di guera USS Gravely pa ehersisionan, meimei di kooperashon antinarkotiko den Karibe ku Maduro ta bisa ku mas bien ta pa purba na bah’é komo presidente. E promé minister, den un aktitut hostil i agresivo kontra di Venezuela, a uni su mes na e plannan di guera di Merka”, segun e vise presidente Rodriguez. “El a disidí na konbertí e teritorio dje pais ruman akí den unu pa avionnan di guera di Merka, den un kolonia militar di Merka pa fia su mes pa e plan di guera kontra di Venezuela i esei ta un guera kontra di petroli i gas”, segun el a agregá.
USS Gravely lo ta na Trinidad te 30 di òktober. Ta un dje barkunan di guera ku Trump a mobilisá den Karibe i ku den próksimo dianan lo haña kompania di USS Gerald R.Ford, esun mas grandi di mundu, ku ta karga avionnan di guera.
Venezuela e siman akí a denunsia di a desmantelá un supuesto “grupo kriminal” vinkulá ku CIA ku tabata buska pa ataká USS Gravely i asina inkriminá Caracas.
