Pasaheronan venezolano na Dorado International Airport di Bogotá, pendiente pa mas informashon despues ku a kanselá nan buelo pa Caracas. Gobièrnu a bisa di a kanselá e buelo pa motibu di infiltrashon di “mersenarionan”.
CARACAS (AFP).- Venezuela a anunsiá e suspenshon di konekshon aéreo ku Colombia despues di denunsiá e yegada di “mersenarionan” ku e plan pa sabotiá próksimo elekshon.
Gobièrnu venezolano konstantemente ta denunsiá plannan pa tumba presidente Nicolas Maduro, supuestamente planiá na Merka i Colombia ku kolaborashon di oposishon.
E minister di interior, Diosdado Cabello, a pone un relashon entre e denunsia nobo aki i e lider opositor María Corina Machado.
E lider opositor, ku ta denunsiá froude den e re-elekshon di Maduro den yüli di 2024, a hasi un yamada pa no tuma parti na e elekshon di gobernador i parlamentarionan dia 25 di mei benidero.
E medida a yega poko promé ku salida di e buelo Bogotá – Caracas dje aerolínea Latam. Algun pasahero ya tabata na bordo ora ku e tripulashon a anunsiá kanselashon dje ruta i anunsiá ku na mester baha. Di regreso den e terminal, nan mester a yama famianan pa buska mas informashon i disidí kiko pa hasi.
“Nan mester pensa riba e pueblo i e hendenan ku t’afo”, segun Gianlore Lorenzo, kende ta un komersiante di 64 aña. “Nan no por laga nos dje manera akí, mi ta spera ku por yega na un soslushon”, el a bisa.
“Mi tin seis aña kaba ku mi no a pone un stap riba Venezuela i awor akí mi tabata bai pasa mi fakansi den mi pais. “E loke ta pasa awor akí ta inhustu”, segun Tahuior Leonitti, un ingeniero di 50 aña ku ta biba na Chile i ku a hasi konekshon na Colombia.
Cabello no a anunsiá pa kuantu tempu e suspenshon ta keda vigente, aunke ku e sistema di informashon pa pilotonan i outoridatnan kolombiano a indiká ku lo ta te djaluna 26 di mei.
