CARACAS, AP.- E gobièrnu di presidente Nicolas Maduro a pidi Fondo Monetario Internashonal un fiansa di 5.000 mion dòler pa fortalesé e kapasidat di Venezuela pa lidia ku propagashon di e vírus nobo. E presidente a kuestioná e organisashon durante vários aña largu.
Den un karta dirigí na Kristalina Georgieva, direktor gerente di FMI, Maduro a pidi a organismo pa “evaluá e posibilidat pa fasilitá Venezuela ku 5.000 mion dòler di e fondo di emergensia di Instrumento di Finansiamentu Rápido”. Asina e kansier venezolano Jorge Arreaza a bisa djamars atraves di su kuenta di Twitter.
E anunsio a sosodé despues di mas di dos dékada di gobièrnu sosialista kaminda ámbos Maduro i su predesesor Hugo Chavez, a akusá FMI di kier imponé un “model kapitalista i salbahe” i di boga pa interes di esnan multimionario i bankonan mundial.
Mas di 60 pais, inkluyendo Merka, ta rekonosé e lider opositor Juan Guaido komo presidente legal di Venezuela. Guaido a proklamá su mes komo mandatario interino na aña 2019 konsiderando ku Maduro su elekshon na 2018 tabata unu froudulento.