E potrèt aki publiká pa presidente di Merka Donald Trump riba Truth Social, ta mustra un boto na kandela despues ku e barku di guera US Military a tira riba dje bou di sospecho ku ta trata di un trafikashon di droga. Venezuela ta insistí ku ta barku di piskadó.
CARACAS (AFP).- Fiskal general di Venezuela, Tarek William Saab, ayera a hasi un apelashon riba Nashonnan Uni pa investigá e loke el a kalifiká komo “krímen kontra di humanidat” kometé di parti di Merka den Karibe, ora ku a tira misilnan riba algun lancha, ku segun Washington tabata transportá droga.
Washington a desplegá un flota di ocho barku i un supmarino den laman di Karibe pa kombatí narkotráfiko i for di inisio di sèptèmber a eliminá tres embarkashon ku supuestamente tabata transportá droga, ku un saldo di 14 morto, segun Donald Trump.
“E uso di misilnan i armanan nuklear pa asesiná piskadónan indefenso den un lancha chikitu ta krímennan kontra di humanidat ku mester keda investigá dor di Nashonnan Uni”, segun Saab. Di su parti, e kansier Yvan Gil a duna di konosé ku Venezuela a hasi un yamada riba Konseho di Seguridat di Nashonnan Uni pa eksigí pa stòp awor dirèkt ku e akshonnan militar di Merka den laman Karibe. “E mesun ofisialnan di Merka ta sigurá ku e akshonnan a resultá den asesinato sin hustisia di sivilnan, ku e intenshon pa sembra teror serka nos piskadónan i den nos pueblo”, segun e minister a skibi riba retnan sosial. El a bisa mas aleu ku ta “fundamental pa respetá soberania polítiko i teritorial di Venezuela i di hinter e region karibense”.
Merka ta akusá e presidente venezolano Nicolas Maduro di supuestamente ta na kabes di organisashonnan di droga i a ofresé un rekompensa di 50 mion dollar pa su kaptura.
