Èks-presidente venezolano, Nicolas Maduro, flankiá pa su kasá Cilia Flores. Venezuela ta pidi pa hustisia merikano duna nan libertat.
CARACAS (AFP).- Ayera Venezuela a solisitá na Nashonnan Uní e liberashon “inmediato” di e presidente bahá Nicolás Maduro, detené na Merka. E petishon akí a tuma lugá na momento ku den e pais tin avanse den liberashon di prezunan polítiko mediante un lei di amnistia promové pa e presidente interino, Delcy Rodriguez.
Tantu Maduro komo su kasá ta detené i ta enfrentá akusashon di trafikashon di droga, miéntras ku e èks-presidente a deklará su mes komo “prezu di guera”. Venezuela ta pidi “liberashon inmediato di parti di gobièrnu di Merka dje presidente konstitushonal di República Bolivariano di Venezuela, Nicolás Maduro, i di su kasá, e promé dama Cilia Flores”, segun e kansier Iván Gil dilanti di Konseho di derechinan humano di Nashonnan Uní.
Despues di e atake norteamerikano, Delcy Rodriguez a asumí poder i a dal un buèlta den e mal relashon ku presidente Donald Trump. El a sede e kontròl di industria petrolero, tambe a start un proseso di liberashon di prezunan polítiko i a ordená pa sera e prizòn Helicoide, señalá komo sentro di tortura. Su ruman, e hefe di Parlamento, Jorge Rodriguez, a informá ku 1.500 persona a solisitá na tribunalnan pa bini na remarke pa amnistia.
E organisashon di derechinan humano Foro Penal, dediká na defensa di prezunan polítiko, a referí na 65 persona kendenan a risibí nan libertat den e último tres dianan. Pero apesar di esei, organisashonnan di derechinan humano ta bisa ku e lei no ta kompleto. Por ehèmpel, e no ta kubri kasonan relashoná ku militarnan será den e prizòn Rodeo 1, kaminda ku 200 prezu durante di wikènt último a drenta wèlga di hamber.
Kore pa responsabilidat
Maduro a goberná ku man di heru entre 2013 i 2026. E tabata bou di investigashon di Korte Penal Internashonal pa krímennan kontra derechinan humano i su re-elekshon di 2024 tabata blanko di denunsianan di froude.
Den un seri di kambio den gabinete ayera, e presidente Rodriguez a baha Camilla Fabri, kasá di Alex Saab, bisando ku tabata usa su nòmber komo minister siendo en realidat e no tabata funshoná komo tal. Saab a keda detené den 2020 den Cabo Verde i ekstraditá pa Merka den òktober di 2021. El a regresá for di Merka den un interkambio di prezunan i a drenta gobièrnu den òktober di 2024.
