E potrèt akí di Presidensia di Venezuela ta mustra Nicolás Maduro (2do-r) huntu ku promé dama venezolano, Cilia Flores, i Minister di Defensa Vladimir Padrino (2do-d) promé ku un reunion ku mando militar na Caracas.
CARACAS (AFP).- Venezuela ta kalifiká e akusashonnan di trafikashon di droga di parti di Merka kontra dje presidente venezolano, Nicolás Maduro, komo ‘mentira grandi’, i a sigurá ku esakinan ta “un operashon mas pa kriminalisá”, e gobièrnu.
E vise presidente i Minister di Petrolio, Decy Rodriguez, a insistí na señalá ku Venezuela “no ta un pais relevante den materia di narkotráfiko”, sitando un informe di Nashonnan Uní.
“Bosnan ta tuma nota ku ta un mentira grandi? Un mentira. Masha hopi falsedat ku e meta pa hinka Venezuela den un lus negativo”, segun Rodriguez den deklarashonnan na prensa rechasando e mandamentu di barkunan di guera norteamerikano den zùit di Karibe, serka dje teritorio venezolano, komo parti di un operashon anti narkótiko.
Washington ta akusá Maduro di ta enkabesá supuesto organisashonnan di narkotráfiko i a oumentá na 50 mion dòler e rekompensa pa esun ku por entreg’é na outoridatnan merikano. E presidente di Merka, Donald Trump, ademas a señalá ku e avionnan venezolano ku ta representá un peliger pa forsanan den Karibe lo por keda “tumbá”.
Siman pasá un flota norteamerikano a hundi un boto ku 11 supuesto narkotrafikante, ku segun Merka a bisa, a sali for di Venezuela. Gobièrnu di Maduro ta konsiderá ku e akshonnan di Washington ta un “menasa” i a ordená pa manda den kareda di 25.000 militar na e fronteranan di Venezuela. Tambe a anunsiá dianan di preparashon pa amplia e reserva militar.
