CARACAS, VENEZUELA.- E presidente di Parlamento di Venezuela, Jorge Rodriguez, a adelantá ku leinan elektoral dje pais lo keda reformá ku mira pa prohibí e partisipashon di “fasistanan” den futuro elekshon, término ku e gobièrnu aktual ta usa pa referí na su atversarionan.
“Mi ta anunsiá nos inisiativa pa revisá tur e leinan elektoral aprobá pa Asamblea Nashonal” di Venezuela, Rodriguez a bisa.
Den e revishon lo inkluí un pakete di leinan komo “Ley Orgánica de Partidos Políticos y
manifestaciones públicas”, tambe lei di prosesonan elektoral i lei di poder elektoral.
“Tur e leinan lo tin komo meta pa kuida i protehá polítika, pero prinsipalmente kuida i protehá e poblashon venezolano i nos teritorio. “No por tin un polítiko ku ta pidi pa invashon tuma lugá…nò”, segun Rodriguez a bisa.
E reelekshon di Maduro no a keda rekonosé pa Merka i tampoko pa Union Europeo i vários pais di Amérika Latina, ku a pidi un publikashon detayá dje votonan.
E hefe parlamentario a bisa mas aleu ku e idea ta “pa señalá ku klaridat ku si ta guera bo ke, bai guera. Pero no sea kobarde i deklará guera bou di kama di un embahada i despues hui”, segun Rodriguez a bisa, refiriendo bon kla sin menshoná nòmber na e eks kandidato presidensial Edmundo Gonzalez.
