…Migrantenan venezolano ta baha for di avion na Aeropuerto Internacional Simon Bolivar na Maiquetia, Venezuela. Gobièrnu venezolano a manda un avion México pa buska nan…
MAIQUETIA, Venezuela (AFP).- Mas ku 300 migrante di Venezuela ku tabata pegá na México a regresá nan pais ayera meimei di un krísis nobo ku Merka, ku ta eksigí pa tuma bèk e deportashonnan poko despues di a manda e venezolanonan un prizòn salvadoreño.
Un avion dje kompania aéreo estatal Conviasa, kontra kua tin sanshon, a yega e aeropuerto di Maiquetia mainta 11:30 ku 311 pasahero na bordo, inkluso 21 menor di edat ku tabata biaha nan so.
En prinsipio nan no ta deportá pa Merka, sino venezolanonan ku no a logra yega na e pais ei. “Danki, danki!”, algun a bisa despues di a baha for di avion.
Migrashon ta e tema prinsipal dje gobièrnu di Donald Trump, kende segun un akuerdo ku gobiernu salvadoreño ta manda un kantidat di ilegal pa keda será na e pais ei.
“Nan a keda sekuestrá pa e gobiernu di El Salvador”, segun reklamo di e minister di interior, Diosdado Cabello, na momentu di risibí e grupo di 311 migrante ku tabata zuai bandera venezolano.
Kasi 8 mion venezolano a bandoná nan pais for di 2014, segun Nashonnan Uní.
Nan a sali pa buska mihó kondishonnan di bida meimei di un profundo krísis ku a baha ekonomia dje pais ku 80%.
Venezuela i Merka no tin relashon diplomátiko for di 2019, ora ku Maduro a kibra relashon ku e promé gobièrnu di Trump. E mandatario norteamerikano no ta rekonosé e reelekshon di Maduro, ku a kuminsá den yanüari último, pa un di tres periodo.
