Enkuentro entre presidente venezolano Nicolas Maduro i e presidente iraní, Ibraham Raisi (foto archivo).
CARACAS (AFP).- Venezuela a informá di a risibí mas di 2 mion di bakuna kontra di polio i hepatitis B di parti di Iran, meimei di un kampaña nobo di inmunisashon.
No tin sifranan ofisial di bakunashon den Venezuela, pero proyekshonnan di Organisashon Mundial di Salú (OMS) ta mustra nivelnan di inmunisashon bou di 95% rekerí pa evitá brote.
OMS a ubiká na 46% e kobertura dje promé dosis di heptatitis B, rekerí oranan despues di nasementu. E promé dosis di polio ta ubiká na 67%.
“Nos meta prinsipal ta pa garantisá e derecho di salú i prevení enfermedatnan a trabes di bakunashon riba hinter e teritorio nashonal”, segun e Minister di Salubridat, Magaly Gutierrez, informando di yegada dje material.
E gobièrnu di presidente Nicolas Maduro a denunsiá difikultatnan pa kompra di bakuna pa motibu dje sanshonnan imponé dor di Merka.
Iran ta un dje prinsipal aliadonan internashonal di Venezuela i na otro okashonnan a sali na ousilio dje pais karibense.
Den 2020 nan a manda 1.5 mion barí di gasolin pa trata na reaktivá e refinerianan di Venezuela, ku e tempu ei tabata pará meimei di un krísis enorme di eskases.
