CARACAS, VENEZUELA, AP.- Venezuela a akusá Merka di plania un gòlpi di Estado ku oposishon pa 1 di sèptèmber, na momentu ku koalishon opositor mester realisá un marcha pa preshoná referèndem revokatorio di mandato di Nicolás Maduro.
E gobièrnu venezolano a rechasá deklarashon di bosero di Departamento di Estado, John Kirby, na fabor di liberashon di eks alkalde di opositor Daniel Ceballos, kende fin di siman a keda trasladá pa un prisòn den sentro di e pais despues ku a suspendé un medida di detenshon domisiliario indikando ku e tabata preparando pa hui.
E gobièrnu di Venezuela a akusá Merka na vários oportunidat di promové konspirashonnan den su kontra.
E supsekretario di Estado merikano Thomas Shannon a bishitá Caracas na mei pa reuní ku opositornan i Maduro, ku kende el kòmbersá tokante e situashon di relashonnan bilateral.
E bishita di Shannon a tuma lugá dos luna despues ku e gobernante suramerikano a ordená retiro di esun enkargá ku negoshi di embahada di Venezuela na Washington, rechasando e desishon di Obama pa renobá su kontrakt. Ámbos pais ta sin embahador desde 2010.
