WILLEMSTAD.-Sentensia a kai na Ulanda awe. Human Rights Caribbean (HRC) ta papia di un sentensia positivo di Hoge Raad na Den Haag. Ta trata e triunfo históriko pa dignidat i derechonan di personanan LGBT na Kòrsou i Aruba, asina HRC ta enfatisá. Hoge Raad ta konfirmá e sentensia di apelashon. Esaki ta nifiká ku pareha di mesun sekso por kasa na Aruba i Kòrsou.
Ta un triunfo grandi despues di un lucha di kuater aña pa igualdat, segun presidente di HRC, Janice Tjon Sien Kie.
E sentensia aki ta rekonosé ku e legislashon aktual ta kontrali na e prohibishon di diskriminashon den Konstitushon di tantu Aruba komo Kòrsou. Segun korte, no tin motibu hustu pa ekskluí pareha di mesun sekso for di matrimonio. Despues di un bataya hudisial largu i intensivo di kuater aña, nos finalmente por kaba e kapítulo aki. E triunfo aki no ta un asuntu solitario, sino e ta e resultado di esfuersonan konhunto di hopi individuo dediká i organisashonnan. Human Rights Caribbean ta gradesido pa e dedikashon di tur esnan envolví ku a kontribuí na e triunfo aki, en espesial nos tremendo tim di abogado ku ta inkluí David Wever, Mirto Murray i e abogadonan di NautaDutilh. Pero tambe partnernan lokal ku ta lucha pa igualdat: Igualdat Kòrsou, Fundashon Orguyo Kòrsou, Kambrada i Curaçao Pride.
Un felisitashon ta bai pa e pareha ku a enfrentá e prosedura hudisial aki huntu ku nos. Awor nan finalmente por duna nan si. E sentensia aki ta habri porta pa un futuro unda amor i kompromiso entre hende di mesun sekso ta keda rekonose kompleto. E ta ofresé speransa i siguridat pa futuro generashonnan ku igualdat i dignidat lo ser respetá.
Ta importante pa enfatisá ku e sentensia aki ta trata tokante matrimonio sivil, i no matrimonio religioso. Matrimonio sivil na Kranshi ta un rekonosimentu legal di e konekshon entre dos persona, sin importá nan sekso. Instansianan religioso ta mantene nan outonomia i por disidí pa nan mes tokante nan práktikanan di matrimonio internamente.
