ULANDA.- Djadumingu, 13 di òktober último, Vereniging Antilliaans Netwerk den kolaborashon ku ‘Black Achievement Month’ i ‘De Nieuwe Liefde’ a otorgá dos galardon di ‘In the Spotlight’ Award 2019.
E promé a bai pa ‘VANTA’, un kolaborashon di músika i ekspreshon di palabra, pa e homenahe na e idioma Papiamentu. E manera úniko ku nan a presentá un historia riba Papiamentu a toka e bestür di Vereniging Antilliaans Netwerk. Na un manera profeshonal i inspirativo a presentá e obra ku ta primintí hopi.
E presentashon di ‘Papia: the Birth of a Language’ tabata kreativo, inventivo i karga ku speransa. Ku speransa, paso tur hende den e sala por a eksperensia kon un tema desafiante, riba idioma, por a keda presentá na un manera kompletamente diferente pa 3 hóben kreadó, e perkushonista i kompositor, Vernon Chatlein, e artista lingwístiko, Juan-Carlos Goilo i e kantante i kompositor, Amber Nijman.
Dr. Francio Guadeloupe, Aruba 1971, ta ganadó di e di dos galardon ‘In the Spotlight’ Award 2019.
Jorien Wuite, e Minister Plenipotensiario di St. Maarten i alabes embahador di ‘Black Achievement Month’ a hasi e entrega di e galardon na Dr. Guadeloupe.
Guadeloupe ta un persona ku na un manera kreativo sa kon pa trata kasonan kompliká i kon pa yega na e kontenido. Su konosementu di siensia sosial pero tambe e konosementu ku e hende komun por usa den su bida diario ta karakterístika di su papel pa pensa riba temanan importante ku ta hunga un papel den e pasado, presente i futuro di e sosiedat karibeño.
Komo antropólogo, el a studia e kompleksidat kultural, tin biaha sofistiká, otro biaha kompleho i na okashon ingenioso, di e sosiedat karibeño.
Melvin Anderson, Aruba 1944, ta e diseñadó di e dos galardonnan ku e tema di 2019 ‘Celebrate Excellence’.
