WILLEMSTAD. – Lamentablemente Kòrsou ta konosé un kaso di asesinato djadumingu 21 yanüari den oranan di mardugá. Tabata mas o ménos 01.11 or ora ku Sentral di Polis a haña notifikashon ku un tiramentu a tuma lugá den un establesimentu na altura di Palu Blanku. Na yegada di e promé patruya polisial nan a topa ku un hòmber drumí abou den e establesimentu mobil i te kaminda esaki tabata posibel i bou di e sirkunstansianan presente, por a mira un herida di bala na e parti ariba di e víktima su kurpa.

For di un investigashon preliminar ku polis a realisá na e sitio a resultá ku e víktima ta traha den e establesimentu. Mas trempan e víktima tabata tin un diskushon ku un persona. E persona a bisé ku e ta bai bin bèk. Despues di un ratu un persona kara tapá a yega na e establesimentu mobil aki i lòs tiru dirigí riba e víktima ku e resultado ariba menshoná.

Ambulans ku a presentá na e sitio a trata di reanimá e víktima pero esaki no a logra. E víktima Lennard Gwensley Frederick nasé na Kòrsou 29 mart 1992 a fayesé na e sitio ei mes. Alrededor di 02.10 or dòkter di polis a konstatá morto di L. Frederick.

Riba òrdu di Fiskal di Ministerio Públiko a konfiská e kurpa sin bida di e víktima pa mas investigashon. Na e sitio polis a konfiská algun huls. E kaso ta den investigashon. Polis ta supliká kualke persona ku ta disponé di informashon ku por yuda den solushon di e kaso aki pa duna polis e informashon aki na telefòn 917(24 ora pa dia) òf 108(number anonimo, kaminda bo anonimidat ta garantisá)

Relato: 02:10

WILLEMSTAD. – Na e momentunan ku nos ta “up-load” e informe aki, nos no por bisa ainda ku eksaktitut den ki kondishon e víktima di un

tiroteo ta. Promé informe ku EXTRA a risibí na e sitio, ta indiká ku un persona a yega na un trùk di pan (gel) ku tin na Palu Blanku a lòs tiru dirigí riba un trahadó ku tin den e trùk i a alkanse na su pechu. Personal di ambulans ku a yega rápido na e sitio, tabata reanimá e víktima, pero e víktima no tabata reakshoná. Su situashon ta kritiko. Mas detaye ta sigui manera ku esakinan drenta.

LAGA UN KOMENTARIO

Please enter your comment!
Please enter your name here