Ta pidi daño perhuisio pa gastunan di telefòn hasí pa Kòrsou

WILLEMSTAD. – Un anochi ku mester a bira un anochi ameno pa dos amiga ta kaba den un drama ora ku nan ta bai ku tres hende hòmber den nan apartamentu. E víktima a entregá keho kontra di e akusado di violashon seksual despues di a drog’é i daño perhuisio inmaterial i tambe material manera entre otro gastunan di telefòn hasí entre di Kòrsou i Hulanda.

Dos amiga a sali un anochi pa keiru den Amsterdam. Nan a drenta den un klup nokturno kaminda ku nan a topa ku dos hende hòmber. Nan a kuminsá kombersá i tabata pasa momentunan ameno. Algu promé ku kuat’or di mardugá, e grupo di kuater aki a disidí di kontinuá nan ambiente (after party) na kas di un otro amigu. Nan ta buska e amigu i bai na e amigu su apartamentu.

Un di e hèmbernan ta sali ku un di e mucha muhénan pa buska cola i dos a keda ku e otro mucha muhé.

E mucha muhé a pidi awa i el a bebe awa, pero el sinti ku e awa ta smak hopi malu i a bèl su amiga i notifik’é ku el a bebe un awa ku ta smak malu.

Un ratu despues e mucha muhé aki a kuminsá sinti su mes malu i no por a kontené su mes riba pia ni sinta. El a bisa e dos hòmbernan ku e ta sinti su mes malu i el a kuminsá soda.

Nan ta hib’é den kamber i pon’é riba kama i akinan e ta kasi lam, pero e por wak i tende, pero no por papia bon. E hòmbernan tabata pasa man riba su kurpa i un dado momentu e ta bira su kara i ta mira su amiga tambe riba e kama banda di dje i tabata sunchi ku un di e hòmbernan.

E dos nan ta sigui pasa man riba su kurpa i direpente el a sinti ku nan a kuminsá mishi ku su parti íntimo. E ke hasi algu pa stòp nan, pero e no tin e forsa i ta trata di bisa su amiga, kiko ta pasando kuné, pero e amiga no tin oido.

Segun su testimonio, t’asina ku un di e hòmbernan a kita su karson i el a sinti tambe ku el a keda penetrá. E ta bisa su amiga ku nan ta penetrando. El a sinti ku el a keda penetrá mas ku un biaha i nan tabata stot e.

Despues e no sa nada mas te ora el a lanta mainta ku un di e hòmbernan, no esun ku a penetr’é)  a hib’é stashon di trein ku el a bai su kas.

El a entregá keho i nan a kue su sanger i a topa droga (MDMA) den su sanger. E víktima aki ta sigur ku nan a tira kos den su awa pa despues abusá di dje seksualmente.

E testimonionan no tabata meskos loke ku a pone ku korte no por a proba ku e víktima a keda drogá i violá. Tin ta bisa ku nan a mira algu, pero no por bisa  ku muchu eksaktitut ku e víktima a keda violá, pa motibu ku niun no a mira e hòmber sin karson òf ku su pénis afó. Nan tur tabata den un kamber i riba un kama.

Korte no por a proba ku a droga e víktima ni tampoko ku e víktima a keda violá. Esaki a pone ku korte a apsolvé e aktuashon di violashon seksual, pero a kondená e akusado pa molèster seksual, dor di pasa man riba pechu i na su parti íntimo di e víktima.

E víktima a pidi un daño i perhuisio di 11.300 euro, pero e echo ku no a haña e akusashon primario probá, hues no por a honra e daño i perhuisio manera e víktima a pidi.

Fiskal a pidi 18 luna di prizòn, pero hues a yega na 4 dia di prizòn ku ta igual ku e dianan ku e akusado a keda den aresto preventivo i 160 ora di kastigu di trabou.

Pa loke ta trata e daño i perhuisio, Korte a laga e 10.000 euro kai i tambe entre otro e yamadanan telefóniko for di Kòrsou pa Hulanda ku e víktima tabatin hopi mester di dje den e temporada ei i a honra solamente 2.704,50 euro.

LAGA UN KOMENTARIO

Please enter your comment!
Please enter your name here