Víktimanan di violensia seksual ta denunsiá silensio di Vatikano

Papa Leo XIV saludando e públiko

SIUDAT DI VATIKANO, SANTA SEDE, AFP.- E abogado di sinku muhé ku ta akusá un saserdote sloveno konosí pa agreshon seksual ta denunsiá silensio di Vatikano den e huisio.
E abogado ta representá un italiano, un franses, un sloveno i dos muhé ku ke keda anónimo kontra Mark Rupnik di 71 aña.
E saserdote i artista di mosaiko ta akusá di a abusá sikológikamente i seksualmente di por lo ménos binti muhé durante kasi 30 aña. Esaki a pasa spesialmente den seno di e komunidat ku e tabata dirigí na Ljubljana, e kapital sloveno.
Vatikano a permití pa sera e kaso sin investigashon na aña 2022. Pero Papa Fransisco a permití pa habri esaki bèk pa motibu di desaroyonan den e proseso.
Den òktober último, Vatikano a anunsiá nombramentu di sinku wes enkargá ku e proseso, sin publiká fecha di e apertura.
E abogado a bisa ku pa vários luna kaba nan no a haña niun informashon.
Pa falta di informashon ofisial, spekulashonnan a multipliká relashoná ku e kaso di Rupnik. Un ‘blog’ italiano a indiká ku e saserdote a keda apsolbé di forma diskreto.
Pero e servisio di prensa di Santa sede a bisa ku esaki no ta kuadra i ku ainda e investigashon ta habrí.
Desde ku a skohe Leo XIV komo Papa den mei di 2025, el a reuní ku víktimanan, pero no a anunsiá niun medida importante relashoná ku e kaso. Awor ku nan ta wardando riba resultadonan konkreto, papa ta bou di preshon ku e kaso di Rupnik.