Irich Siegmund (r) di Partido Alternativa pa Alemania (AfD), kandidato prinsipal den e estado Saxony-Anhalt, ta dirigí su mes na sostenedónan dje partido despues di nan viktoria di ayera.
PARIS, Fransia (AFP).- E viktoria amplio di ekstremo derecha di Alemania den e elekshonnan di Sajonia-Anhalt ta “un momento grave”, segun Minister di Asuntunan Oropeo di Fransia, hasiendo yamada na polítikonan dje kontinente pa skucha ku humildat.
Partido Alternativa pa Alemania (AfD), kontra di migrantenan i ku bon relashon ku presidente ruso, Vladimir Putin, i esun norteamerikano, Donald Trump, a gana e elekshonnan den e estado aki di Alemania. Nan a hasi esei ku 44% dje votonan, segun proyekshonnan ku a keda publiká.
“Esaki ta un momento grave pa Europa, pa mira ku derecho ekstremo ta gana elekshon regional den Alemania”, segun e minister Benjamin Haddad. “Nos mester skucha ku humildat, skucha e preokupashonnan, e miedunan i reakshoná riba eseinan. Pero nashonalismo i xenofobia nunka lo ta e solushon”, segun el a asentuá.
“Nos no por lubidá nos historia. Esei ta e sentido di desishonnan di Fransia i Alemania”, el a agregá refiriendo na e relashon estrecho entre e dos potensianan europeo.
Na e momento aki, AfD lo haña 39 asiento den e parlamento regional, tres ménos ku e kantidat nesesario pa por tin e mayoria apsoluto (42). Ningun region aleman for di 1945 bin ariba no a keda goberná pa derecho ekstremo.
