NEW YORK, USA (AFP).- E wes dje kaso kontra di Donald Trump pa kompra di silensio dje eks-aktris porno Stormy Daniels a aplasá e anunsio di su kondena pa tempu indefiní, loke ta keda konsiderá komo un viktoria legal pa e presidente eligí.
Den su desishon, e wes di orígen kolombiano Juan Merchán a aplasá e sentensia ku e mester a anunsiá dia 26 di novèmber, i a aseptá ku e defensa por presentá un rekurso -promé ku 2 di desèmber- pa no bin ku sentensia den e kaso.
Trump, di 78 aña, den mei a keda deklará kulpabel di 34 akusashon di “falsifikashon grave” relashoná ku pago di 130.000 dollar na e eks-aktris di sine porno Stormy Daniels, pa esaki warda silensio riba un supuesto relashon pafó di matrimonio den 2006, loke ku semper e magnate a nenga.
Pa e fiskalnan,e pago ei tabata pa skonde un eventual skandal ku lo a kompaña e kampaña di presidensia den 2016 ku el a gana kontra dje demokrat Hillary Clinton.
E defensa di Trump a trata di tur manera pa evitá kualke sentensia ku e magnate republikano lo mester a bolbe sinta den banki di akusado promé ku e elekshonnan di 5 di novèmber.
Promé ku e elekshon, abogado di Trump a pidi pa para e kaso di Manhattan den kuadro di un desishon di Tribunal Supremo, ku a diktaminá ku e presidentenan tin inmunidat pa aktonan realisá durante di nan mandato.
Pero e fiskalnan di Manhattan a argumentá ku tempu ku e akshonnan dje kaso Stormy Daniels a tuma lugá, Trump no tabata presidente.
E fiskal di Manhattan, Alvin Bragg, djamars a duna di konosé ku e por ta na fabor di un “suspenshon” di e prosedimentunan debí na ”sirkunstansianan sin presedente” generá pa e elekshon di Trump pa regresá White House dia 20 di kanari 2025.
“Den un desishon di viktoria pa presidente Trump, e kaso falsu den Manhattan awor ta kompletamente suspendé i e sentensia aplasá”, segun e direktor di komunikashon dje republikano, Steven Cheung.
