Abelardo de la Espriella kompañá pa su famia tras di un glas kontra bala despues di resultado preliminar na Barranquilla
BOGOTA, COLOMBIA, AFP.- E kandidato presidensial iskierdista derotá na Colombia a pidi e pueblo pa trankilisá djaluna i a distansiá su mes di aktonan di violensia ku a sosodé despues di e viktoria di su rival derechista.
E abogado, Abelardo de la Espriella, respaldá pa Kas Blanku, a gana e di dos buèlta presidensial djadumingu ku un diferensia di un porshento. Su viktoria a pone fin na e promé gobièrnu iskierdista den historia di Colombia.
E diferensia di un porshento a provoká disturbio den siudatnan di Bogotá i Cali, kaminda manifestantenan a enfrentá polis anti disturbio i a sende vários lugá na kandela djadumingu.
E kandidato derotá, Ivan Cepeda, a bisa ku “tur protesta mester keda den e límitenan di trankilidat i mobilisashon pasífiko”.
Ku kasi tur voto kontá, De la Espriella a haña 49,66% di votonan kontra 48,70% di Cepeda.
Ku un diferensia di mas o ménos 250.000 voto, e senador iskierdista ainda no a rekonosé su derota. El a bisa ku mester verifiká tur resultado promé.
Por spera e resultadonan definitivo pa mañan.
Na Cali, e terser siudat di mas grandi den e pais, manifestantenan a kima banderanan di Merka i konfrontá polis. Algun tabatin baranan di metal i e agentenan a tira gas lakrimógeno pa plama e multitut.
Sostenedónan di Abelardo de la Espriella selebrando su viktoria elektoral na Colombia
