PORT-AU-PRINCE, HAITI (AFP).- E violensia di gèngnan kriminal ku ta afektá Port-Au-Prince ta plamando pafó di kapital dje pais i te hasta den barionan kaminda ku ántes tabata konsiderá ku tin seguridat, segun un informe di ONU.
E informe huntu ku Ofisina di Alto Komisionado di Nashonnan Uní pa derechinan Humano i di Ofisina Integrá di ONU na Haiti ta sentrá den e sektor di BasArtibonite (sentro), 100 kilometer di e kapital, ku ta eksperensiando un oumento signifikativo di violensia di gèng den último dos añanan.
Entre yanüari di 2022 i òktober di 2023, por lo ménos 1.694 persona a keda asesiná, heridá òf sekuestrá den e área ei, segun e informe, i e sekuestradónan pa pidi reskate “a bira un temor konstante pa esnan ku ta usa transporte públiko”. Por papia di un”oumento impaktante di violensia dje gèngnan”, ku ta kontrolá 80% di Port-Au-Prince. E reporte ta pidi pa un”despliegue urgente” dje mishon di seguridat multinashonal liderá pa Kenia ku aprobashon di konseho di Seguridat den òktober.
E informe ta referí na un ehèmpel di un dama di 22 aña sekuestrá den luna di mart den for di un bus. E dama a keda batí i violá durante mas di dos siman, pa despues ora e haña su libertat e fayesé.
Segun e mesun fuente, e gruponan kriminal ta ataká aldeanan rival, i ta abusá seksualmente di muhénan i menornan di edat.
Mas aleu nan ta hòrta tur kos den kasnan, hòrta bestianan i kultivo di agrikultornan i ta destruí kanalnan di awa, fòrsando e habitantenan pa move pa otro barionan.
“E situashon den Haiti ta katastrófiko”, segun e Alto Komisionado di ONU pa derechinan Humano, VolkerTurk, den un komunikado di su ofisina, agregando ku e violensia te hasta ta afektá hospitalnan.
Segun Turk, por lo ménos 3.960 persona a muri, 1.432 a resultá heridá i 2.951 a keda sekuestrá e aña’ki na Haiti.
